20 වැනි ආණ්ඩුක්‍රම ව්‍යවස්ථා සංශෝධන කෙටුම්පත පිළිබඳව ජාතික සමගි ජන බලවේගය සකස් කළ සමාලෝචන වාර්තාව අද (21 වැනිදා) එම පක්ෂයේ පාර්ලිමේන්තු මන්ත්‍රී කණ්ඩායම හමුවට ඉදිරිපත් කිරීමට නියමිතය.

එම වාර්තාවේ අන්තර්ගතය පිළිබඳ දීර්ඝ ලෙස සාකච්ඡා කිරීමෙන් අනතුරුව ශ්‍රේෂ්ඨාධිකරණය හමුවේ අභියෝගයට ලක් කෙරෙන කරුණු හඳුනා ගැනීම සිදු කෙරෙන බව සමගි ජන බලවේගයේ ජාතික සංවිධායක පාර්ලිමේන්තු මන්ත්‍රී තිස්ස අත්තනායක පවසයි.

‘‘අධි පිරිවැය සංශෝධනය පිළිබඳව සමාලෝචනය කරන්න දහ නවයෙන් ඔබ්බට කියලා කමිටුවක් පත්කළා. රාජිත සේනාරත්න, තිස්ස අත්තනායක, සරත් ෆොන්සේකා, එරාන් වික්‍රමරත්න, හර්ෂද සිල්වා වැනි කණ්ඩායමක් මේ කමිටුවට ඇතුළත්. දැනට එම කමිටුවේ වාර්තාව සාකච්ඡාකරමින් පවතිනවා. සඳුදා අපේ පාර්ලිමේන්තු කණ්ඩායම රැස්වෙනවා. ඒ රැස්වීමට මෙම කමිටු වාර්තාව ඉදිරිපත් කර වැඩිදුරටත් සාකච්ඡා කිරීමට අපි අපේක්ෂා කරනවා.’’

‘‘විසිවැනි සංශෝධන කෙටුම්පතේ අන්තර්ගතය අධිකරණය හමුවේ අභියෝගයට ලක්කරන කරුණු පිළිබඳ එහිදී හඳුනාගැනීමට අපි බලාපොරොත්තු වෙනවා. විශේෂයෙන්ම ද්විත්ව පුරවැසියකුට පාර්ලිමේන්තුවට පැමිණීමේ හැකියාව ලබාදීම, පාර්ලිමේන්තුව විසුරුවීමේ කාලය සංශෝධනය වගේ අභියෝගයට ලක්කළ හැකි ප්‍රමුඛ කරුණු ගණනාවක් අපි හඳුනාගෙන තියෙනවා.’’ යැයි තිස්ස අත්තනායක මන්ත්‍රීවරයා වැඩිදුරටත් පැවසීය.