කුරුඳු අපනයනය කරන මුවාවෙන් කසළ තේ ඉරාකයට යැවිමේ ජාවාරමක නිරත වූ පුද්ගලයින් තිදෙනෙකු අත්අඩංගුවට ගෙන තිබේ.

රේගු අවදානම් කළමනාකරණ ඒකකයේ නිලධාරින් විසින්  සිදුකළ විමර්ශනවලට අනුව මෙම සැකකරුවන් අත්අඩංගුවට ගෙන ඇති බව වාර්තා වේ.

කුරුඳු බාහලුමක් ඉරාකයට අපනයනය කිරීම සඳහා රේගු අංගනයේ රඳවා තිබිය දී ඒ සම්බන්ධයෙන් සැකසිතූ රේගු නිලධාරින් අදාළ බහලුමේ අපනයනකරුට සහ වාප්පු ලිපිකරුට රේගුව හමුවේ පෙනී සිටින ලෙස දැනුම් දී තිබුණි.

එහෙත් අදාළ සැකකරුවන් රේගුව හමුවේ පෙනී නොසිටිම හේතුවෙන් අධිකරණ නියෝගයක් ගෙන ඔවුන් අත්අඩංගුවට ගැනිමට කටයුතු කළ බව රේගු දෙපාර්තමේන්තුව සඳහන් කළේය.

සැකකරුවන් අත්අඩංගුවට ගැනිමෙන් අනතුරුව අපනයනය කිරිමට සැලසුම් කර තිබූ රේගු බහලුම පරීක්ෂා කර ඇති අතර එහි තිබූ කසළ තේ මෙට්‍රික් ටොන් 1000ක් සොයාගෙන තිබේ.

මේ ආකාරයට කුරුඳු අපනයනය කරන බව රේගුවට පවසා කන්ටේනර් බහලුම් 70ක් පමණ මේ වන විට ඉරාකයට යවා ඇති බවට රේගුව සිදුකළ මූලික විමර්ශනවලින් අනාවරණය වී ඇත.

මෙම ජාවාරමට සම්බන්ධ  සැකකරුවන් තිදෙනෙකු අත්අඩංගුවට ගෙන ඇති අතර තවත් තිදෙනෙකු අත්අඩංගුවට ගැනිම සඳහා විමර්ශන ආරම්භ කර ඇති බව රේගු අවදානම් කළමනාකරණ අංශය සඳහන් කළේය.