ජනාධිපති අලෙක්සැන්ඩර් ලුකශෙන්කෝට එරෙහිව බෙලරුස් වැසියන් යළිත් විරෝධතාවල නිරතව සිටී.

එහිදී විරෝධතාකරුවන් සියයකට වැඩි පිරිසක් අත්අඩංගුවට ගෙන ඇති බවද විදෙස් වාර්තා සඳහන් කළේය.

බෙලරුස් ජනාධිපතිවරයාට එරෙහිව “මින්ස්ක්” අගනුවර පැවති විරෝධතාවට පුද්ගලයන් දහස් සංඛ්‍යාත පිරිසක් එක්ව සිටියේය.

අගනුවර නිදහස් චතුරස්‍රයටත් විරෝධතාකරුවන් රැස්ව සිටින බව සඳහන් වේ.

විරෝධතාකරුවන් පාලනය කිරීම සහා නගරයේ ආරක්ෂාව සඳහා පොලිස් නිලධාරින් රැසක් අනුයුක්ත කර ඇති බවත් එරට වාර්තා සඳහන් කළේය.

පසුගිය 9 වැනි දා පැවති මැතිවරණයද ජයගනිමින් නැවත වරක් රටේ පාලනය තමා සතු කර ගැනීමට ජනාධිපති ලුකශෙන්කෝ සමත් විය.

එහෙත් විරෝධතාකරුවන් පවසන්නේ මැතිවරණයේදී වංචාවක් සිදුකර ඇති බවය.

මැතිවරණයෙන් පසුව ජනාධිපතිවරයාට එරෙහිව ආරම්භ වූ විරෝධතාව අඛණ්ඩව මේ වන තුරුත් පැවැත්වේ.

මේ අතර, පොලීසිය විසින් වරින් වර අත්අඩංගුවට ගැනීම් සිදුකර තිබේ.

ඒ අනුව, විරෝධතාකරුවන් සියයකට වැඩි පිරිසක් මේ වන විට රැඳවුම් භාරයේ පසුවන බව විදෙස් වාර්තා වැඩිදුරටත් සඳහන් කළේය.