කොරෝනා වෛරසය හේතුවෙන් පීඩාවට පත්ව සිටින අමෙරිකානු ජනතාවට ඩොනල්ඩ් ට්‍රම්ප් ගේ බිරිඳවන මෙලනියා ට්‍රම්ප් සිය කණගාටුව ප්‍රකාශ කර ඇතැයි විදෙස් මාධ්‍ය පවසයි.

ජනාධිපති ඩොනල්ඩ් ට්‍රම්ප්, කොරෝනා වෛරසය අමෙරිකාව තුළ  පැතිරයාම පිළිබඳව මෙතෙක් අනුගමනය කර ඇත්තේ ලිහිල් ප්‍රතිපත්තියකි.

නමුත් රිපබ්ලිකන් පක්ෂයේ ජාතික සමුළුව අමතමින් මෙලනියා ඉස්මතු කළේ ඊට හාත්පස වෙනස් දෙයකි.

වෛරසය ආසාදනය වී දුක්විඳින ජනතාව වෙනුවෙන් කැපවී සේවය කරන වෛද්‍යවරු සහ සෞඛ්‍ය අංශ සේවකයින්ට ඇය සිය කෘතඥතාවය පළ කළාය.

“තම සමීපතමයින් මියයාම නිසා දුකට පත් සියලුදෙනාට සහ ආසාදිතව දුක්විඳින අයට මාගේ අනුකම්පාව හිමිවෙනවා. මම දන්නවා බොහෝ අය සරණක් නෑ කියලා කණගාටුවෙන් ඉන්නේ. මම ඔබට කියන්න කැමතියි ඔබ කිසිවෙක් තනිකර නැහැ,” යනුවෙන් ඇය පැවසුවාය.

තම සැමියාගේ ක්‍රියාකලාපය ට මානුෂික ස්වරූපයක් ලබාදීමට ද ඇය උත්සහ කළ බව වාර්තා වේ.

නොවැම්බර් 3 වැනිදා අමෙරිකානු ජනාධිපතිවරණය පැවැත්වීමට නියමිත අතර ඩොනල්ඩ් ට්‍රම්ප් මේ වනවිටත් කාන්තාවන් අතර විරෝධයට ලක්වූ පුද්ගලයෙක් බවට පත්ව සිටී.

ඊයේ දිනයේද කොරෝනා වෛරසය හේතුවෙන් අමෙරිකාවේ පුද්ගලයින් 1,200ක් පමණ මියගොස් තිබේ. මේ දක්වා එරටින් වාර්තා වී ඇති කොරෝනා මරණ ගණන 180,000ට ආසන්නය.