රටේ ආහාර ඉවතලෑම ‘කම්පනය ඇතිවන’ තත්ත්වයක් බව ජනාධිපති ෂී ජින් පිං විසින් හැඳින්වීමෙන් පසුව චීන පරිපාලනය විසින් වහාම ආහාර අපද්‍රව්‍ය අවම කිරීමට පියවර ගෙන තිබේ. ජනපතිවරයා පසුගියදා අනතුරු අඟවා තිබුණේ කොවිඩ්-19 වසංගතය විසින් ආහාර අපද්‍රව්‍ය පිළිබඳව දැඩි අවධානයක් යොමුකළ යුතු බව පවසමිනි. ඒ අනුව දැන් චීන පරිපාලනය ‘පිරිසුදු පිඟන් ව්‍යාපාරය’ නමින් වැඩසටහනක් ආරම්භ කර ඇත.

අදාළ වැඩසටහන අනුව ‘චීනය ආහාර සුරක්ෂිතතාව පිළිබඳ අර්බුදකාරී හැඟීමකින් කටයුතු කළ යුුතු’ බවට තීරණය කෙරී ඇත. කොවිඩ්-19 වසංගතය අතරතුර පසුගියදා දකුණු චීනය පුරා සති ගණනාවක් පුරා සිදුවූ මහා වර්ෂාවෙන් හටගත් ජල ගැල්ම හේතුවෙන් ගොවිපොළවල් රැසක් විනාශ වී ටොන් ගණනාවක ආහාර තොග විනාශ වී තිබේ.

ජනාධිපතිවරයාගේ පණිවිඩය අනුව වූහාන් ආහාරපාන කර්මාන්ත සංගමය දැන් නගරයේ අවන්හල්වලින් ඉල්ලා ඇත්තේ රාත්‍රි භෝජනයට ලබාදෙන ආහාර ප්‍රමාණය සීමා කරන ලෙසයි. කණ්ඩායම් විසින් එක් ආහාර වර්ගයක් පමණක් ඇණවුම් කළ යුතු ක්‍රමවේදයක් ක්‍රියාත්මක කළ යුතු බවද අවන්හල්වලට දැනුම් දී ඇත. N-1 යනුවෙන් නම්කර ඇති මෙම ක්‍රමය ඔස්සේ පුද්ගලයන් 10 දෙනකුගෙන් සමන්විත කණ්ඩායමකට ඇණවුම් කළහැක්කේ පිඟන් 09ක් පමණි. මෙම N-1 සංකල්පය අන්තර්ජාලය ඔස්සේ යම් පමණකට විවේචනය වී ඇත. සමහරු පෙන්වා දී ඇත්තේ එය ඉතා දැඩි උපදෙසක් බවයි. ඔවුන් ප්‍රශ්න කර ඇත්තේ එක් පුද්ගලයකු අවන්හලකට ගියහොත් ඇණවුම් කළ යුත්තේ කුමන ආහාරයක්දැයි කියාය.

මේ අතර චීන රාජ්‍ය මාධ්‍ය ආයතනයක් වන CC TV ඇතුළු තවත් ආයතන කිහිපයක් අවන්හල් ආශ්‍රිතව විශාල ආහාර නාස්තියක් සිදුවන බවට ප්‍රවෘත්ති වාර්තා කිරීමද අන්තර්ජාලය ඔස්සේ විවේචනයට ලක්වී ඇත. චීනය මීට ඉහතදී ද ආහාර නාස්තිය අවම කිරීමේ වැඩසටහන් ක්‍රියාත්මක කර තිබේ.