හිටපු අගමැති රනිල් වික්‍රමසිංහ, හිටපු ඇමැතිවරුන් වන මංගල සමරවීර, රවුෆ් හකීම්, පාඨලී චම්පික රණවක, සරත් ෆොන්සේකා, සහ මලික් සමරවික්‍රම ඇතුළු 11 දෙනකුට මෙම 21 වැනි දින දේශපාලන පළිගැනීම් පිළිබඳ ජනාධිපති කොමිසම හමුවේ පෙනී සිටින ලෙසට ඊයේ (12 වැනිදා) නියෝග කර තිබේ.

පසුගිය රජයේ දේශපාලන පළිගැනීම් පිළිබඳ​ සොයා බැලීමට ජනාධිපති ගෝඨාභය රාජපක්ෂ විසින් පිහිටුවනු ලැබූ ජනාධිපති කොමිසම හමුවට හිටපු අගමැති රනිල් වික්‍රමසිංහ කැඳවා ඇත්තේ ප්‍රථම වරටය.

පසුගිය රජය සමයේ දේශපාලන පළිගැනීම් සිදු කළ බවට චෝදනා එල්ල වන හිටපු අගමැති රනිල් වික්‍රමසිංහ, හිටපු ඇමැතිවරුන් වන මංගල සමරවීර, පාඨලී චම්පික රණවක, රාවුෆ් හකීම්, මලික් සමරවික්‍රම, සරත් ෆොන්සේකා, දෙමළ ජාතික සන්ධානයේ නායක ආර්. සම්බන්දන්, පාර්ලිමෙන්තු මන්ත්‍රී එම්. ඒ. සුමන්තිරන්, ජනතා විමුක්ති පෙරමුණේ නායක අනුර කුමාර දිසානායක, නීතිඥ ජේ.සී. වැලිඅමුණ, ආචාර්ය ජයම්පති වික්‍රමරත්න යන 11 දෙනා වගඋත්තරකරුවන් ලෙස නම් කර, ඔවුන් සියලුදෙනා ජනාධිපති කොමිසම හමුවට කැඳවන ලෙස ජ්‍යෙෂ්ඨ නීතිඥ සෙනරත් ජයසුන්දර ඉල්ලා සිටියේය.

දේශපාලනික වශයෙන් පළිගැනීමට ලක්වූ බව සඳහන් කරමින් ආර්ථික සංවර්ධන අමාත්‍යාංශයේ හිටපු ලේකම් වෛද්‍ය නිහාල් ජයතිලක ගොනු කළ පැමිණිල්ලකට අදාළව නීතිඥ සෙනරත් ජයසුන්දර එම ඉල්ලීම කළේය.

එම ඉල්ලීම සලකා බැලූ ජනාධිපති කොමිසම, හිටපු අගමැති රනිල් වික්‍රමසිංහ ඇතුළු 11 දෙනා අදාළ පැමිණිල්ලේ වගඋත්තරකරුවන් ලෙස නම් කර ඔවුන්ට ලබන 21 වැනි දින ජනාධිපති කොමිසම හමුවේ පෙනී සිටින ලෙස දන්වා නොතිසි නිකුත් කළේය.

ඊට අමතරව මෙම පැමිණිල්ලේ වගඋත්තරකරුවන් ලෙස නම් කරනු ලැබූ අපරාධ පරීක්ෂණ දෙපාර්තමේන්තුවේ හිටපු ජ්‍යෙෂ්ඨ නියෝජ්‍ය පොලිස්පති රවී වෛද්‍යලංකාර, දූෂණ මර්දන ලේකම් කාර්යාලයේ ආනන්ද විජේපාල, හිටපු දිවිනැගුම අධ්‍යක්ෂ ජනරාල් එම්. සුමනපාල යන තිදෙනාටද එදිනට කොමිසම හමුවේ පෙනී සිටින ලෙස දැනුම් දී තිබේ.