සෞඛ්‍ය අමාත්‍යාංශ මාධ්‍ය ප්‍රකාශක වෛද්‍ය හේමන්ත හේරත් මහතා පවසන්නේ ඉතා වේගවත් ව්‍යාප්තියක් සහිත කොවිඩ් 19 වෛරසයේ ඩෙල්ටා ප්‍රභේදයේ ආසාදිතයන් 14 දෙනෙකු හඳුනාගෙන ඇති බවයි.

ඒ අනුව ශ්‍රී ලංකාවෙන් හඳුනාගෙන ඇති සමස්ත කොවිඩ්19 වෛරසයේ ඩෙල්ටා ප්‍රභේදය ආසාදිතයින් සංඛ්‍යාව 19 දක්වා ඉහළ යන බව සෞඛ්‍යය අංශ පවසා සිටී.

මීට පෙරද මෙම ප්‍රභේදය ආසාදිත පුද්ගලයන් 05 දෙනෙකු මෙරටින් හඳුනාගෙන තිබුණි.

ඊයේ(03) දිනයේ හඳුනාගන්නා ලද ඩෙල්ටා ප‍්‍රභේදය ආසාදිතයන් 14 දෙනා අතර කොග්ගල ආයෝජන ප්‍රවර්ධන කලාපයේ ඇඟළුම් කර්මාන්තශාලාවක සේවිකාවක ද සිටින බව වෛද්‍ය හේමන්ත හේරත් මහතා පවසා සිටී.

හබරාදුව සෞඛ්‍ය වෛද්‍ය නිලධාරී කාර්යාලය මේ බව බව තහවුරු කරමින් පවසා සිටින්නෙ අදාළ සේවිකාව රත්ගම ප්‍රදේශයේ පදිංචිකාරියක් බවයි.

ඩෙල්ටා ප‍්‍රභේදය ආසාදිතයන් 14 දෙනෙකු එකවර හමුවීමත් සමග සෞඛ්‍ය අංශ දැඩි තිගැස්මට ලක් ව ඇති අතර ඔවුන් ජනතාවගෙන් ඉල්ලා සිටින්නේ සෞඛ්‍ය මාර්ගෝපදේශ ඉතා දැඩිව පිළිපදින ලෙසයි.