ශ්‍රී ලංකා සිවිල් ගුවන් සේවා අධිකාරිය නිවේදනයක් නිකුත් කරමින් පවසා සිටින්නේ කොවිඩ් අවදානම හේතුවෙන් එළඹෙන ජූලි 01 වනදා සිට  ජූලි 13 වනදා දක්වා තවත් රටවල් 06ක සිට පැමිණෙන ගුවන් මගීන්ට මෙරටට පැමිණීම අත්හිටුවා ඇති බවයි.

ඒ අනුව, සවුදි අරාබිය, ඩුබායි, කටාර්, කුවේට්, බහරේන් සහ ඕමාන් යන රටවල් සිට පැමිණෙන මගීන් සඳහා එම තහනම පනවා බල පැවැත්වෙනු ඇති බව එම නිවේදනය වැඩිදුරටත් පවසා සිටී.

ගුවන් සමාගම් එම රටවල සිට පැමිණෙන ගුවන් මගීන් එම කාලසීමාව තුළ ශ්‍රී ලංකාවට රැගෙන ඒමෙන් වළකින ලෙස සිවිල් ගුවන් සේවා අධිකාරිවරයා එම නිවේදනය මගින් දන්වා සිටී.

ඊට අමතරව ජුලි මස 31 වනදා දක්වා ඇංගෝලාව, බොස්ට්වානා, ලෙසෙතෝ, මොසැම්බික්, නැම්බියාව, ස්වාසිලන්තය, සැම්බියාව සහ සිම්බාබ්වේ යන අප්‍රිකානු රටවල් වල සිට පැමිණෙන මගීන් සඳහා ද මෙරටට පැමිණීමේ තහනමක් පැනවීමට ඊයේ (28) සිවිල් ගුවන් සේවා අධිකාරිවර්යා පියවර ගනු ලැබීය.