බස්නාහිර පළාත් හිටපු ආණ්ඩුකාර අසාද් සාලි මහතාට එරෙහිව ත්‍රස්තවාදය වැළැක්වීමේ පනත හා එක්සත් ජාතීන්ගේ සිවිල් හා දේශපාලන අයිතිවාසිකම් පිළිබඳ සම්මුති පනත යටතේ කොළඹ මහාධිකරණය හමුවේ අධි චෝදනා ගොනුකර තිබෙන බව නීතිපතිවරයා ශ්‍රේෂ්ඨාධිකරණයට දැනුම් දී තිබේ.

පසුගිය මාර්තු 09 වනදා ආන්දෝලනයකට තුඩු දුන් මාධ්‍ය සාකච්ඡාවක් පවත්වා මතභේදයට තුඩුදුන් ප්‍රකාශ සිදුකිරීමේ සිද්ධිය සම්බන්ධයෙන් මෙම අධි චෝදනා ගොනු කිරීම සිදු කරණ බවද නීතිපතිවරයා ශ්‍රේෂ්ඨාධිකරණයට වැඩිදුරටත් කරුණු වාර්තා කරණ බවද දන්වා සිටී.

අද (28) ‍ශ්‍රේෂ්ඨාධිකරණය හමුවේදී, ත්‍රස්තවාදය වැළැක්වීමේ පනත යටතේ අත්අඩංගුවට ගෙන රඳවාගෙන සිටින තමන් මුදාහරින ලෙස ඉල්ලමින් අසාත් සාලි මහතා විසින් ඉදිරිපත්කළ මූලික අයිතිවාසිකම් පෙත්සම කැඳවූ අවස්ථාවේදී නීතිපතිවරයා වෙනුවෙන් පෙනී සිටි නියෝජ්‍ය සොලිස්ටර් ජනරාල් දිලීප පිරිස් මහතා අදාළ දැනුම් දීම කළ බවද වාර්තාවේ.

ප්‍රියන්ත ජයවර්ධන, යසන්ත කෝදාගොඩ සහ ඒ. එච්. එම්. ඩී. නවාස් යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේදී මෙම පෙත්සම අද(28) දින කැඳවනු ලැබූ අවස්ථාවේදී නියෝජ්‍යය සොලිස්ටර්වරයා මේ බව අනාවරණය කළ බවද වාර්තාවේ.

ජූලි මස 29 වනදා පෙත්සම සලකාබැලීම සඳහා කැඳවීමට නියම කළ බවද වාර්තා වේ.