කෘෂිකර්ම අමාත්‍ය මහින්දානන්ද අලුත්ගමගේ මහතාගේ ප්‍රධානත්වයෙන් අද (18) කෘෂිකර්ම අමාත්‍යාංශයේදී පැවැත්වුණු එළැඹෙන මහ කන්නයට අවශ්‍ය කාබනික පොහොර නිෂ්පාදනය හා සැපයුම පිළිබඳ සාකච්ඡාවක් අතරතුර පවසා සිටියේ එළැඹෙන මහ කන්නයට අවශ්‍ය නයිට්‍රජන් දියර පොහොර ආනයනය කිරීමට පියවර ගන්නා බව යි.

එහිදී ඒ මහතා පවසා සිටියේ,“නයිට්‍රජන් දියර අපි ආනයනය කරනවා. මේක සඳහා අපි ජාත්‍යන්තර ටෙන්ඩරයක් දාලා අවශ්‍ය කටයුතු කරමින් යනවා.“

තවද මහ කන්නය සඳහා කාබනික පොහොර නිකුත් කරන ප්‍රමාණයන් පිළිබඳවද මෙහිදී තිරණය කළ බව වාර්තා වේ.

ඒ අනුව හෙක්ටයාරයක් සඳහා ගොවියෙකුට කාබනික පොහොර කිලෝග්‍රෑම් 500ක්, ශාක පෝෂක ඇමෝනියම් ඇසිඩ් කිලෝග්‍රෑම් 5ක්, පොටෑසියම් කිලෝග්‍රෑම් 35ක් සහ ජෛව පොහොර ලීටර 10ක් ලබාදීමට මෙහිදී නිර්දේශ කර තිබේ.

මීට අමතරව හෙක්ටයාරයක් සඳහා කාබනික පොහොර නිෂ්පාදනය කරන එක් ගොවියෙකු සඳහා රුපියල් දස දහසක් ලබාදිමටත් රජය තීරණය කර ඇති බවද අනාවරණය කළේය.