කොත්මලේ ජලාශයේ පිවිසුම් මාර්ගයක් අසල අඩි 06 ක පමණ කොටසක් ඊයේ (26 දා) දින ගිලා බැස ඇති බව නුවරඑළිය දිස්ත‍්‍රික් ආපදා කළමනාකරණ ඒකකයේ සහකාර අධ්‍යක්ෂක රංජිත් අලහකෝන් මහතා පැවසීය.

කොත්මලේ ජල පෝෂක ප‍්‍රදේශවලට ඇද හැලූණු අධික වර්ෂාවත් සමග මෙම ගිලා බැසීම සිදුවී තිබේ. ජලාශ වේල්ලට මීටර් කිහිපයක් නුදුරින් කොත්මලේ හරංගල හරහා නාවලපිටියට පිවිසෙන මාර්ගයේ ස්භාවික ඇළක් හරහා ඉදිකර තිබෙන බෝක්කුවක් මෙලෙස ගිලා බැස ඇති බව ඉංජිනේරුවරයා කියා සිටියේය. ඊයේ (26 දා) දින අලූයම 5.00 ට පමණ ගිලා බැස ඇති බවත්, ගිලා බැසීම හේතුවෙන් කොත්මලේ ජලාශ වේල්ලට කිසිඳු හානියක් හෝ අවදානමක් නොමැති බවත්, ගිලා බැස ඇති ස්ථානය පිළිසකර කිරීමට කටයුතු කරන බවත්, එතෙක් ජලාශ වේල්ල හරහා රථ වාහන ධාවනයට අවසර ලබා නොදෙන බව කාර්ය භාර ඉංජිනේරුවරයා වැඩිදුරටත් කියා සිටියේය.

නුවරඑළිය – නාලක රත්නායක