ජනාධිපති ගෝඨාභය රාජපක්ෂ මහතා ලබා දී ඇති උපදෙස් පරිදි වහාම ක්‍රියාත්මක වන පරිදි “පාම් තෙල්“ ආනයනය සම්පූර්ණයෙන් තහනම් කිරීම සඳහා වූ අදාළ ගැසට් නිවේදනය ඊයේ (05) නිකුත් කරන ලෙස ජනාධිපති ලේකම් විසින් ආනයන අපනයන පාලක වෙත දැනුම් දී ඇති බව වාර්තා වේ.

මේ අතර දැනට ආනයනය කර ඇති පාම් තෙල් ආනයනය කරුවන්ට නිකුත් කිරීම සම්පූර්ණයෙන්ම නතර කරන ලෙස ද රේගු අධ්‍යක්ෂ ජනරාල්වරයාට උපදෙස් දී ඇති බව නිවේදනයක් නිකුත් කරමින් ජනාධිපති මාධ්‍ය අංශය පවසා සිටී.

මෙරට කටු පොල් වගාව ක්‍රමයෙන් නතර කිරීමට ජනාධිපතිවරයා විසින් මීට මාස 6කට පමණ පෙර උපදෙස් දී තිබුණු අතර එම උපදේශය බලාත්මක කරමින් අදාළ නීති යටතේ නියෝග පැන වීමටද ජනාධිපතිවරයා විසින් නියෝග පනවා තිබේ.

දැනට පවතින කටු පොල් වගාව අදියරෙන් අදියර වරකට 10% බැගින් ගලවා ඉවත් කර ඒ වෙනුවට රබර් හෝ පරිසර හිතකාමී වෙනත් වගාවන් කිරීමට එම සමාගම් හා ආයතන සමඟ නීතියෙන් බැඳීම සඳහා අවශ්‍ය පියවර ගැනීමට ද උපදෙස් දී ඇත.

මෙය සම්පූර්ණයෙන් ක්‍රියාත්මක වූ විට කටු පොල් වගාව සහ පාම් තෙල් පරිභෝජනය සම්පූර්ණයෙන්ම නතර කිරීම රජයේ අරමුණ වී තිබේ.