සිංහරාජ රක්ෂිතයේ වැව් ඉදිකිරීමේ ව්‍යාපෘතියක් පිළිබඳ මාධ්‍ය මඟින් පළ වූ වාර්තා සම්බන්ධයෙන් වාරිමාර්ග අමාත්‍ය චමල් රාජපක්ෂ මහතා අද (23) දින පාර්ලිමේන්තුවේ දී පැහැදිලි කිරීමක් සිදුකළේය.

ඒ සමගි ජන බලවේගයේ, පාර්ලිමේන්තු මන්ත්‍රී බුද්ධික පතිරණ මහතා ඇසූ ප්‍රශ්නයකට පිළිතුරු දෙමිනි.

පාර්ලිමේන්තු මන්ත්‍රී බුද්ධික පතිරණ,

“මාතර දිස්ත්‍රික්කයේ ඇති අතිරික්ත ජලය විද්‍යානුකූලව හම්බන්තොට ට ගෙන යාම පිළිබඳ ගැටලුවක් නැහැ. පසුගිය දවසක මාධ්‍යයෙන් පළවුණා සිංහරාජයේ වැව් දෙකක් හදලා එහි වතුර හම්බන්තොට ට ගෙනියනවා කියලා. සිංහරාජය අශ්‍රිතව අක්කර 5ක් වැව් දෙදක් හදලා ඒ වතුර ගෙනියනවා කියලා. සිංහරාජය තුළ වැව් දෙකක් හදනවාද ? නැතිනම් ඉන් එළියේ හදනවා ද? “

අමාත්‍ය චමල් රාජපක්ෂ,

“නිල්වලා ගඟේ ගංවතුර ගැලීමත් ගිං ගඟේ ගංවතුර ගැලීමත් නිසා විශාල හානියක් සිදුවෙනවා. ඒ වගේම දැනට අවුරුදු 90කට පමණ පෙර කළු ගඟේ වතුරත් ගිං ගඟේ වතුරත් නිල්වලා ගඟේ වතුරත් ඊසාන දිගට ගෙනියන්න සැලැස්මක් වාරිමාර්ග දෙපාර්තමේන්තුවේ තියෙනවා. නමුත් කිසිම ආණ්ඩුවක් මේවා කරලා නැහැ. ඒ නිසා අද ජල පිපාසයෙන් ජීවත්වෙන විශාල ජනකොටසක් ඉන්නවා. ඉතින් මේක කවදා හරි කෙරෙන්න ඕනේ. ඒ හින්දා මේ ව්‍යාපෘතිය අවුරුදු ගාණනකට කලින් තමයි සැලසුම්කරලා තියෙන්නේ. මම දන්නවා සිංහරාජය ඉතාමත් ප්‍රශ්නයක් නමුත් අවුරුදු ගණනකට පෙර තිබුණු යෝජනාවක්. ඒ යෝජනාවල තියෙනවා ගිං ගඟේ පහළ කොටසේ, දැනට ජනතාව පදිංචිවෙලා ඉන්න කොටසේ මම හිතන්නේ පවුල් 100කට අඩු ගණනක් පදිංචිවෙලා ඉන්න කොට්ඨාසයේ ඒ පදිංචි වෙලා ඉන්න ස්ථානයේ අක්කර 5ක විතර සැලැස්මක් තියෙනවා පොඩි ජලාශයක්. නමුත් ඒක සැලැස්මට යුනෙස්කෝ එකේ අවසරයත් ඉල්ලා තියෙනවා. ඔවුන් අධ්‍යනය කරලා එයින් විශාල හානියක් සිදුවෙනවා ද කියලා බලන්න කියලා තියෙන්නේ එහෙම නැති වුණොත් ගං වතුර වළක්වා ගැනීමත් ජල පිපාසයෙන් ඉන්න ජනතාවට ජලය ලබා දෙන්න බැරි වෙනවා. ඒ නිසා මේ හැම දෙයක්ම බලලා තමයි ක්‍රියාත්මක කරන්නේ. මේක මාධ්‍ය තුළින් ප්‍රකාශ වුණේ සිංහරාජ කැළේ මුදුණේ වැව් හදනවා කියලා. මේවා ගැන මාධ්‍ය වුණත් රටේ ජනතාව අවුසන්නේ නැතිව කිව්වේ මොකක්ද කෙරෙන්නේ මොකක්ද කියලා සෙවීම වැදගත් වෙනවා.”
(දෙරණ වාර්තා)