වව්නියාව පොලිස් විශේෂ කාර්ය බලකා කඳවුරට ලැබුනු බුද්ධි තොරතුරකට අනුව එහි නිලධාරීන් පිරිසක් විසින් වව්නියාව සෙට්ටිකුලම් ආනවිලුන්දාව රක්ෂිතයේ සිදු කළ මෙහෙයුමකදී මහා පරිමාණයෙන් පස්කපන යන්ත්‍ර යොදා රක්ෂිතය එලිපෙහෙලි කරමින් සිටි සැකකරුවන් දෙදෙනෙකු සහ අදාල යන්ත්‍රය අත්අඩංගුවට ගත් බවට වව්නියාව පොලිස් විශේෂ කාර්ය බලකා කඳවුර පවසයි.

එහිදී අදාල පුද්ගලයින් කිසිදු අවසරයකින් තොරව රජයේ රක්ෂිත මායිම් එලිපෙහෙලි කරමින් සිටි බවට අනාවරනය වීමෙන් අනතුරුව පස්කපන යන්ත්‍රය සහ සැකකරුවන්ට එරෙහිව නීතිමය පියවර ගැනීම සඳහා සෙට්ටිකුලම් අඩවි වන නිලධාරී කාර්යාලයට භාර දීමට වව්නියාව පොලිස් විශේෂ කාර්ය බලකා නිලධාරීන් විසින් පියවර ගනු ලැබීය.

පසුගිය වසරේ අගෝස්තු මස දෙරණ “උකුස්සා” කළ අනාවරණයකින් පසු රක්ෂිතයේ සිදුවූ විනාශයක් පිළිබඳ පාර්ළිමේන්තුවේදී ද හඬ නැගුණු අතර පසුව අනාවරණය වූයේ එම විනාශය පුත්තලම පාර්ළිමේන්තු මන්ත්‍රී සනත් නිශාන්ත මහතාගේ සහෝදරයා වන ආරච්චිකට්ටුව ප්‍රාදේශීය සභා හිටපු සභාපති විසින් සිදු කර ඇති බවයි. ඒ සම්බන්ධයෙන් රිමාන්ඩ් බන්ධනාගාර ගත කළ ඔහු 2020 සැප්තැම්බර් මස 24 වන දින හලාවත මහේස්ත්‍රාත් අධිකරණය ඇප මත මුදාහැර තිබුණි.