ඊයේ (03) උදෑසන ඉරණතිව් දූපතට පිවිසෙන ඉරණමාතා නගර් ප්‍රදේශයේදී කොවීඩ් වෛරසයෙන් මිය ගිය සිරුරු ඉරණතිව් දූපතේ වලදැමීමට රජය විසින් ගෙන ඇති තීරණයට එරෙහිව දැඩි විරෝධයක් පල කිරීමට එම දූපත් වැසියෝ කටයුතු කර තිබූ බව වාර්තාවේ.

ඉරණතිව් දූපතට පිවිසිය යුතු ප්‍රධාන ගම්මානය ඉරණමාතා ප්‍රදේශය වේ. ඉරණමාතා ගම්මානයේ කතෝලික පියතුමන්ලා සහ ස්වේච්ඡා සංවිධාන මෙන්ම ගම්වාසීන්ද මෙම විරෝධතාවය සංවිධානය කිරීමට සහභාගි වී තිබූ බවද වාර්තා වේ.

විරෝධතාවයේ නිරත වූ ඉරණමාතා නගර් ප්‍රදේශයේ වැසියන් මාධ්‍යට අදහස් දක්වමින් පවසා සිටියේ, යුද්දෙන් පසුව 2017 වසරේදී ඉරණතිව් දූපතට නැවත පදිංචියට ගිය වැසියන්ගෙන් මේ වන විට නැවත පදිංචි පවුල් 108 කට අයත් පුද්ගලයින් 335 දෙනෙකු ජීවත්ව සිටින බවයි. එසේම දූපතේ සිටින කිසිදු වැසියෙකු මේ වන තුරුත් කොරෝනා ආසාදිත හෝ බලපෑමකට ලක්ව නොමැති අතර කොරෝනා සිරුරු දූපතේ වල දැමීම හේතුවෙන් ඉරණතිව් වැසියන් දැඩි අවධානමකට ලක්වන බව ඔවුහු පැවසූහ. ඒ අනුව කොරෝනා සිරුරු දූපතේ වලදැමීමේ තීරණය වහාම නතර කළ යුතු බව ඔවුහු අවධාරණය කළහ.

මෙහිදී කොරෝනා සිරුරු වලදැමීමට යැයි හාරන ලද සැකසහිත වලවල් කිහිපයක් වසා දැමීමට ඉරණතිව් වැසියන් පිරිසක් පියවර ගෙන තිබුණු බවද වාර්තාවේ.