2019 ජනාධිපතිවරණයේදී ගෝඨාභය රාජපක්ෂ මහතාගේ ජයග්‍රහණය වෙනුවෙන් ඉමහත්වූ කැපවීමකින් කටයුතු කළ “මැදපෙරදිග ශ්‍රී ලාංකික එකමුතුව” පසුගියදා පැවැත්වූ මාධ්‍ය සාකච්ඡාවකදී; කොවිඩ් වසංගතය හේතුවෙන් අන්ත අසරණ තත්වයට පත්ව සිටින මැදපෙරදිග ශ්‍රී ලාංකිකයින් ලංකාවට ගෙන්වා නිවෙස් නිරෝධායනට ලක්කරණ ලෙස ඔවුන් කර ඇති ඉල්ලීම සම්බන්ධයෙන් පළවූ අදහස් මෙසේය;

“අපි අතින් වියදම් කරගෙන ගුවන් යානයකින් රාත්‍රියේ ලංකාවට ගිහිල්ල ජනාධිපතිවරණය දවසෙ උදේ ගෝඨාභය මහත්තයට ඡන්දෙ දාල එදාම රෑ ආපහු ආවා. ඒ හැමදෙයක්ම කරේ රට ගැන හිතල හොරකම් නවත්වන්න, වංචා දූෂණ නවත්තන්න ගෝඨාභය මහත්තයගෙන් රටට වැඩක් වෙයි කියල හිතල.

පසුගිය කාළයේ අපි ජනාධිපතිතුමා, අගමැතිතුමා, සෞඛ්‍ය බළධාරීන් ඇතුළු වගකිවයුතු රාජ්‍ය නිළධාරීන්ට ලිඛිත ඉල්ලීමක් කරා ලංකාවට පැමිණීමට අපේක්ෂා කරන මැදපෙරදිග ඇතුළු විදෙස්ගත සියලු ශ්‍රී ලාංකිකයින්ට නිසි සෞඛ්‍ය නිර්දේශ යටතේ නිවෙස් නිරෝධායනයට අවස්ථාව සළසා දෙන ලෙසට. නමුත් අවුරුද්දකට ආසන්න එම ඉල්ලීමට තවමත් කිසිදු පිළිතුරක් නැහැ.

විවිධ බුබුලු නමින් විදේශිකයින්ට රටට ඇතුල්වීමට අවසරදෙන්නේ නම් ශ්‍රී ලාංකිකයින් වන අපව රටට භාරනොගන්නේ ඇයි දැයි ප්‍රශ්ණ කළයුතු වෙනවා. විවිධ ජාවාරම් කරුවන්ගේ අපේක්ෂාවන් සාක්ෂාත් කරගැනීම සඳහා රටට විදේශ විනිමය වැඩියෙන්ම සොයාදෙන අපේ ජීවිත සමග සෙල්ලම් කිරීමට ඉඩනොදෙන ලෙස දන්වා සිටිනවා.”