පසුගියදා පාර්ළිමේන්තු මන්ත්‍රී පූජ්‍ය අතුරලියේ රතන හිමියන් විසින් 27/2 අනුව පාර්ළිමේන්තුවේදී සිදුකරන ලද යෝජනාවට අද (12) දින අධිකරණ අමාත්‍ය අලි සබ්රි මහතා පැහැදිලි කිරීමක් සිදුකරන ලදී. එහිදී ඔහු පවසා සිටියේ මුස්ලිම් විවාහ හා දික්කසාද නීතිය අහෝසි කළ යුත්තේ විහාර දේවාගලම් පණත ඇතුළු සියලුම පුද්ගලික නීති අහෝසි කිරීමත් සමඟ බවයි.

එහිදී වැඩිදුරටත් අදහස් දක්වමින් අලි සබ්රි මහතා මෙසේද පැවසීය.

“එකම රටක්- එකම නීතියක් යනුවෙන් අපි කල්පනා කරන්නේ මේ රටේ ජීවත්වන සියලු දෙනාටම නීතිය එක හා සමාන ලෙස ක්‍රියාත්මක විය යුතුයි කියන එකයි. එය පොදුවේ රට තුළ සෑම තැනකම ක්‍රියාත්මක විය යුතුයි කියන එකයි. ලංකාවේ පුද්ගලික නීතීන් රාශියක් ක්‍රියාත්මක වෙනවා”.

“උදාහරණ ලෙස උඩරට විවාහ හා දික්කසාද නීතිය, උඩරට අනුප්‍රාප්ත නීතිය, යාපනය විවාහ හා අයිතිවාසිකම් හා අනුප්‍රාප්ත නීතිය, තේසවලාමේ නීතිය, මුස්ලිම් විවාහ හා දික්කසාද පණත, මුස්ලිම් අනුප්‍රාප්තික නීතිය, බෞද්ධ විහාර හා දේවාලගම් පනත, හින්දු සංස්කකෘති පනත, මුස්ලිම් බහු විවාහ පණත, චර්ච් ඔෆ් සිලෝන් පණත ආදී වශයෙන් පුද්ගල නීතීන් රාශියක් ක්‍රියාත්මක වනවා. එවැනි නීති අප රටේ විතරක් නෙවෙයි වෙන රටවලත් තියෙනවා. ඉදිරියේදී මෙය වෙනස් කොට පොදුවේ එක රටක් – එක නීතියක් යටතේ සියලුම දෙනාටම එකම නීතියක් ක්‍රියාත්මක විය යුතු නම් එය මුස්ලිම් නීතිය පමණක් අහෝසි කිරීමෙන් කරන්නට බැහැ. සියලුම පුද්ගලික නීති අහෝසි කළ යුතුයි”.

“මේ අනුව මෙම ගරු සභාවට මා ප්‍රකාශ කර සිටින්නේ මුස්ලිම් නීතිය වෙනස් කිරීම; අනිවාර්යයෙන්ම පුද්ගලික නීති සියල්ල එකට අහෝසි කරන අවස්ථාවේදී විය යුතුයි කියන එකයි. එය කළ යුතුයි කියලා රජය තීරණය කරන්නේනම් අලුත් ව්‍යවස්ථාවෙන් එය සිදුකළ යුතුයි, සිදුකළ හැකියි”