මාතලේ සහ මහනුවර දිස්ත‍්‍රික්කවලට මායිම්ව පිහිටි මීමුරේ ගම්මානයේදී හෙට (13දා) ජනාධිපති ගෝඨාභය රාජපක්ෂ මහතාගේ සහභාගිත්වයෙන් මී ළඟ ‘ගම සමග පිළිසඳරක් ’ වැඩසටහන පැවැත්වීමට නියමිතය.එම හමුවේදී මීමුරේ ගම්මානයේ සිට ලෝක උරුම නකල්ස් (දුම්බර) වනාන්තරය මැදින් මාතලේ, ලග්ගල, පල්ලේගම දක්වා කිලෝමීටර් 8 ක මහා මාර්ගයක් තැනීමටද අක්කර 90 ක වාරිමාර්ග රක්ෂිත වනාන්තරයක් කපා කුඹුරු බවට පත්කිරීමේ යෝජනාවක් ඉදිරිපත් කිරීමටද නියමිත බව පරිසරවේදීහු චෝදනා කරති.

මෙම විනාශකාරි යෝජනා දෙක මීමුරේ ගම්මානය නියෝජනය කරන ප‍්‍රාදේශීය දේශපාලකයකුගේ හා හිටපු පරිපාලන නිලධාරියකුගේ උපක්‍රමයකට අනුව ඉදිරිපත් කිරීමට නියමිත බව පරිසරවේදීහු තවදුරටත් චෝදනා කරති. මෙම යෝජනාව ඉදිරිපත් කිරීම සඳහා දැනටමත් දෙදෙනකු නම් කර ඇතැයිද පරිසරවේදීහු අනාවරණය කරති. මෙහිදී පරිසරවේදීන් පෙන්වා දෙන්නේ මෙම තීන්දු දෙක ඉතා පැහැදිලිවම නකල්ස් රක්ෂිතයේ දැව හෙළීම අරමුණු කරගනිමින් ඉදිරිපත් වන යෝජනා දෙකක් බවයි.