පාර්ලිමේන්තු මන්ත්‍රී පිල්ලෙයාන් නොහොත් සිවනේස්තුරයි චන්ද්‍රකාන්තන් මහතා දෙමළ ජාතික සංවිධානයේ පාර්ලිමේන්තු මන්ත්‍රී ජෝසෆ් පරරාජසිංගම් ඝාතන නඩුවෙන් නිදහස් කර තිබේ.

සිවනේස්තුරයි චන්ද්‍රකාන්තන් නොහොත් පිල්ලෙයාන් මහතා ජෝසප් පරරාජසිංගම් ඝාතන සිද්ධියට සැකපිට අත්අඩංගුවට පත්වී වසර 4ක් පමණ රක්ෂිත බන්ධනාගාරගත කර සිටි අතර පසුගිය නොවැම්බර් 24 වනදා ඔහුට ඇප නියම විය.

මඩකලපුව මහාධිකරණ විනිසුරු ඩී. සුසයිදාසන් මහතා ඉදිරියේදී අදාළ නඩුව පසුගිය සදුදා (11) මඩකලපුව මහාධිකරණයේදී විභාගයට ගැණුනු අතර නීතිපති වෙනුවෙන් පෙනීසිටි රජයේ ජ්‍යෙෂ්ඨ නීතිඥයා මෙම නඩුව ඉදිරියට ගෙනයෑමට අදහසක් නොමැති බව දැනුම්දීමෙන් අනතුරුව අධිකරණය දැනුම්දුන්නේ අද දින (13) නඩු තීන්දුව දෙන බවය.

දෙමළ ජාතික සන්ධානයේ මඩකලපුව දිස්ත්‍රික් හිටපු පාර්ලිමේන්තු මන්ත්‍රී ජෝසප් පරරාජසින්ගම් 2005 වසරේ දෙසැම්බර් 25 වන දින මඩකලපුව ශාන්ත මරියා දේවස්ථානයේදී ඝාතනය කරන ලද්දේ රාත්‍රී දේවමෙහෙය අතරතුරදීය.

සිද්ධිය සම්බන්ධයෙන් සිවනේස්තුරයි චන්ද්‍රකාන්තන් මහතා සමඟ සැකපිට අත්අඩංගුවටගෙන රක්ෂිත බන්ධනාගාරගත කර සිටි තවත් සැකකරුවන් සිව්දෙනෙකුද අද නිදහස් කෙරුණි.