කම්කරු ඇමැති නිමල් සිරිපාල ද සිල්වා මහතා ඊයේ (08 ) පාර්ලිමේන්තුවේදී පවසා සිටියේ විදෙස්ගත ශ‍්‍රී ලාංකිකයන් මෙරටට ගෙන්වා ගැනීම සඳහා නිශ්චිත කාල රාමුවක් ඉදිරිපත් කිරීම ප‍්‍රායෝගික නොවන බවයි . එහිදී එතුමා අවධාරණය කළේ ශ‍්‍රී ලංකාවට පැමිණීමෙන් පසු මුදල් ගෙවා නිරෝධායනය වීමට හැකියාවක් නොමැති ශ‍්‍රී ලාංකිකයන් සඳහා බලකිරීමකින් තොරව නොමිලේ අදාළ පහසුකම් රජය විසින් ලබා දී ඇති බවයි.

2019 පෙබරවාරි මාසයේ සිට ශ‍්‍රී ලංකා රජය මේ දක්වා විදේශයන්හි අසරණ වූ විවිධ ක්‍ෂේත‍්‍රයන්හි නියැලී සිටි ශ‍්‍රී ලාංකිකයන් 61,750 කට අධික පිරිසක් මෙරටට ගෙන්වා ගැනීමට කටයුතු කර ඇති බව එතුමා පවසා සිටියේය. එසේම, මේවන විට තවත් රටවල් 137ක වෙසෙන ශ‍්‍රී ලාංකිකයන් 69,000කට ආසන්න පිරිසක් මෙරටට පැමිණීමේ අපේක්‍ෂාවෙන් සිටින බව පුවත් වාර්තා සඳහන් කරයි. එම පිරිස් අතුරින් රටවල් 15ක සේවය කරන ශ‍්‍රී ලාංකික ශ‍්‍රමිකයන් 41,452 ක් ශ‍්‍රී ලංකාවට නැවත පැමිණීමට අපේක්‍ෂාවෙන් ලියාපදිංචි වී ඇත.

විදෙස්ගතව සිට ශ‍්‍රී ලංකාවට පැමිණෙන ශ‍්‍රී ලාංකිකයෙකු අනිවාර්ය දින 14 ක නිරෝධායන කාල සීමාවකට යටත් වේ. එසේ වුවද, ගෙවීම් කර නිරෝධායන ස්ථානයක නවාතැන් ගන්නා ලෙස ඉල්ලා සිටින කිසිදු ප‍්‍රතිපත්තියක් හෝ මාර්ගෝපදේශයක් මෙතෙක් ඉදිරිපත් කර නොමැත.