කම්කරු ඇමැති නිමල් සිරිපාල ද සිල්වා මහතා කම්කරු අමාත්‍යාංශයේ ජනවාරි 04 වනදා පැවැති ජාතික කම්කරු උපදේශක සභා රැස්වීමේදී පවසා සිටියේ අයවැය යෝජනාවලට අනුව පෞද්ගලික අංශයේ විශ‍්‍රාම යෑමේ වයස අවුරුදු 60 දක්වා දීර්ඝ කර තිබුනද යම් සේවකයකුට වයස අවුරුදු 55 න් සේවය අවසන් කර සේවක භාරකාර හා සේවක අර්ථ සාධක අරමුදල්වල තැන්පතු ලබාගැනීමේ හැකියාව ඇති බවයි.

එහිදී කම්කරු ඇමතිවරයා වැඩිදුරටත් පවසා සිටියේ, පෞද්ගලික අංශයේ සේවකයන් විශ‍්‍රාම යෑමේ වයස 60 දක්වා දීර්ඝ කරනු ලැබුවේ වෘත්තීය සමිතිවල ඉල්ලීම මත බවත්, සේවකයාට අවශ්‍ය නම් අවුරුදු 55 න් හෝ 60 න් විශ‍්‍රාම යෑමේ හැකියාව පවතින බවත්ය.

මේ සම්බන්ධයෙන් පවතින පනත් සංශෝධනය කළයුතු නිසා වෘත්තීය සමිති නායකයන් සහ හාම්පුතුන්ගේ සම්මේලනයේ නියෝජිතයින් සාකච්ඡා කර යෝජනා තමන් වෙත ලබාදෙන ලෙස ඉල්ලා සිටි ඇමැතිවරයා කම්කරු කොමසාරිස් ජනරාල්වරයාගේ ප‍්‍රධානත්වයෙන් සාකච්ඡා කමිටුවක් ඉක්මණින් කැඳවා තීරණයක් ගෙන තමන් දැනුවත් කරන ලෙසද දන්වා සිටියේය.

මෙම අවස්ථාවට අමාත්‍යාංශ ලේකම් මාපා පතිරණ, කම්කරු කොමසාරිස් ජනරාල් නීතිඥ ප‍්‍රභාත් චන්ද්‍රකීර්ති, ජාතික උපදේශක සභාව නියෝජනය කරමින් ලෙස්ලි දේවේන්ද්‍ර, ඇන්ටන් මාකස්, සිල්වෙස්ටර් ජයකොඩි, වසන්ත සමරසිංහ, ලීනස් ජයතිලක යන මහත්වරුන් ඇතුළු වෘත්තීය සමිති නායකයෝ එක්ව සිටියහ.