අද ජනාධිපති කාර්යාලයේ පැවති දෛනිකව රැස්වන කොවිඩ් කමිටු රැස්වීමේදී; හෙට (23) අලුයම 2.00 සිට නැවත දැනුම් දෙන තුරු එක්සත් රාජධානියේ සිට මෙරටට ඇතුළු වන සියලු ගුවන් ගමන් අත්හිටුවීමට ජනාධිපති ගෝඨාභය රාජපක්ෂ මහතා තීරණය කර තිබේ.

එම රැස්වීමේදී එංගලන්තයේ පැතිරෙන නව කොවිඩ් වෛරස් ප්‍රභේදය හා එහි ව්‍යාප්තිය සමාලෝචනය කිරීමෙන් පසු මේ තීරණයට එළැඹි බවයි ජනාධිපති මාධ්‍ය අංශය නිවේදනය කළේ.

එංගලන්තයේ සිට අද දිවයිනට ළගාවීමට නියමිත මඟීන් PCR පරීක්ෂණයට ලක් කිරීමෙන් පසු, දින 14ක කාලයක් සෞඛ්‍ය අංශවල පූර්ණ නිරීක්ෂණය ඇතිව නිරෝධායනය කෙරෙන අතර තවත් දින 14ක කාලයක් ඔවුන් සිය නිවෙස්වල නිරෝධායනය විය යුතුය.

ලන්ඩනයේ සිට එන භාණ්ඩ ප්‍රවාහන ගුවන් යානාවල කාර්ය මණ්ඩල ද නිරෝධායන ක්‍රියාවලියට යටත් වෙති. කොවිඩ් එන්නත කඩිනමින් ශ්‍රී ලංකාවට ගෙන්වා ගැනීමේ අවශ්‍යතාව අද කොවිඩ් කමිටු රැස්වීමේදීත් අවධානයට යොමු වූ අතර එම එන්නත් පිළිබඳ සවිස්තර අධ්‍යයනයකින් පසු අදාළ රටවල් සහ මෙරට සෞඛ්‍ය බලධාරීන් සමඟ සාකච්ඡා කොට අවශ්‍ය ක්‍රියාමාර්ග සම්බන්ධීකරණය සඳහා ජනාධිපති ප්‍රධාන උපදේශක ලලිත් වීරතුංග මහතා හට බලය පවරනු ලැබ ඇත.

ඇමරිකාව, රුසියාව, එංගලන්තය, චීනය ප්‍රමුඛ රටවල් කිහිපයක් කොවිඩ් එන්නත් නිපදවා තිබේ. එන්නත ලබාදිය යුතු කණ්ඩායම් අවශ්‍යතාව සහ ප්‍රමුඛතාව අනුව තීරණය කෙරේ. වතු, මහල් නිවාස, නේවාසිකාගාර ඇතුළුව රෝගය පැතිරයාමේ වැඩි අවදානමක් ඇති ස්ථාන සහ කණ්ඩායම් පිළිබඳව දත්ත රැස් කිරීමට ද තීරණය කර ඇත.