පාස්කු ඉරුදින ත්‍රස්ත ප්‍රහාරයෙන් පසු දිවයිනේ විවිධ ප්‍රදේශවල මුස්ලිම් පල්ලිවලින් සොයාගත් කඩු තණ කොළ කැපීම සඳහා භාවිත කර ඇති බවට පැවසූ හිටපු අමාත්‍ය M.H.M. හලීම් මහතා ඊයේ (14) දින ජනාධිපති කොමිසම හමුවේ කියා සිටියේ එම කඩු ව්‍යාපාරික කටයුතු සඳහා ගෙනෙන්නට ඇති බවය.

මේ අතර ත්‍රස්තවාදය වැළැක්වීම පනතේ විධිවිධාන ප්‍රකාරව රැඳවුම් භාරයේ සිට පසුගියදා මුදාහැර තිබු හිටපු අමාත්‍ය රිෂාඩ් බදියුදින් මහතාගේ සහෝදර රියාජ් බදියුදින් ද සාක්ෂි විමසීම සඳහා  ඊයේ ජනාධිපති කොමිසමට කැඳවා තිබුණි.

කොම්පඤ්ඤවීදි‍යේ මුස්ලිම් පල්ලියකින් එවක සොයාගන්නා ලද කඩු කිහිපයක්ද හිටපු අමාත්‍ය M.H.M. හලීම් මහතා අද ජනාධිපති කොමිසමට ගෙනවිත් ඇති අයුරු දක්නට තිබුණි.

මෙහිදී රජයේ අධිනීතිඥවරයා හිටපු අමාත්‍යරයාගෙන් විමසුවේ, “ඔබට හොඳ මිදුලක් එහෙම තියෙන නිවසක් තිබේද?,” යන්නය.

එහිදී “ඔව් ස්වාමිනි,” යැයි ලැබුණු පිළිතුරත් සමඟ රජයේ අධිනීතිඥවරයා පෙරළා ප්‍රශ්න කළේ, “එම ගෙවත්තේ තණකොළ සුද්ද පවිත්‍ර කරන්නේ කෙසේද?,” යන්නය.

ඊට පිළිතුරු දුන් හලීම් මහතා, “මම සේවකයන්ට කියලා යන්ත්‍රානුසාරයෙන් සුද්ද කරනවා,” යැයි ප්‍රකාශ කළේය.

“එතකොට ඔබතුමා කඩු එහෙම දැකලා තියෙනවාදැයි?,” රජයේ අධිනීතිඥවරයා විමසා සිටියේය.

ඊට සිනහමුසු මුහුණින් පිළිතුරු දුන් හිටපු අමාත්‍යවරයා, “ස්වාමිනි, ඔය අහන්නේ කඩු ද?, පිහි ද? ඒ උපකරණ හඳුනාගැනීම සම්බන්ධයෙන් නම් මට ප්‍රශ්නයක් තියෙනවා,” යැයි පැවසීය.

එහිදී රජයේ අධිනීතිඥවරයා, “හරි ඔබතුමා ඉස්සෙල්ලාම කියන්නකෝ කඩු භාවිත කරන්නේ මොකටද කියලා?,” යනුවෙන් විමසා සිටියේය.

“කඩුනම් ස්වාමිනි රජ කාලේ පාවිච්චි කළේ යුද්ධ කරන්න,” යැයි හිටපු අමාත්‍යවරයා පිළිතුරු දීමත් සමග, “එහෙනම් හලීම් මහත්මයා, දැන් කාලෙත් යුද්ධ කරන්න කඩු පාවිච්චි කරන්න පුළුවන් නේද?,” විමසු රජයේ අධිනීතිඥවරයා 2019 අප්‍රේල් මස 30 වන දින අද දෙරණ ප්‍රවෘත්ති ඔස්සේ විකාශය වු ප්‍රවෘත්ති සාකච්ඡාවක් කොමිසම හමුවේ ඇසෙන්නට සලස්වනු ලැබීය.

“ස්වාමිනි මේ මාධ්‍ය සාකච්ඡාවේදී මම කඩු කියන වචනය මගේ කටින් කියන්නේ නැහැ. නමුත් මාධ්‍යවේදින් කඩු හම්බෙන්නේ කොහොමද කියලා අහපුවාම සුසාන භූමි සුද්ද කරන්න භාවිතකරන කැත්ත ගැන හිතලා පිළිතුරු දෙනවා.” යැයි විඩීයෝ දර්ශනය අවසානයේ හලීම් මහතා කරුණු පැහැදිළි කළේය.

එහිදී සභාපති විනිසුරුවරයා විමසා සිටියේ “ඔබ ඔය කියන්න හදන්නේ කඩු තියාගන්න ඇත්තේ වෙන වෙන හේතුවලට කියලාද?,” යනුවෙනි.

“ස්වාමිනි මම කඩුයි කැත්තයි කියන එකේ වෙනස දැනගෙන හිටියේ නෑ,” යැයි හලීම් මහතා යළි සඳහන් කිරීමත් සමඟ ජනාධිපති කොමිසමේ සභාපතිවරයා මෙලෙස විමසීය.

“හලීම් මහත්මයා. සහරාන්ගේ මල්ලි රිල්වානුයි, ඒ කණ්ඩායමේ මිල්හානුයි කඩු විශාල ප්‍රමාණයක් මෙරටට ගෙන්වාගෙන ඒවා යම් පුද්ගලයෙක් මාර්ගයෙන් බේරුවල ප්‍රදේශයට යැව්වා. එතනදී කොළඹ එක්තරා පල්ලියකට කඩු 50ක් දීලා තියෙනවා. ඒ සම්බන්ධයෙන් අදාළ මුස්ලිම් පල්ලියේ මව්ලවිවරයා අත්අඩංගුවට ගත්තා කියලා නොදැන ද ඔබ ඔය ප්‍රකාශය කළේ?,”

“ස්වාමිනි, මම මේ පල්ලිවල කඩු තබාගෙන ඉඳලා හම්බවෙනවා කියන එක ගැන සොයා බැලුවා. ව්‍යාපාර කරන්න ගෙනාපු පිහි වගයක් හම්බෙනවා කියලා තමයි දැනගන්න ලැබුනේ. මම දන්නේ නැහැ. පිටරටවලින් කඩු ගෙනාවද නැද්ද කියලා. නමුත් මම කියපු එකේ වරදක් නැහැ. කැති වගේ දෙවල් පල්ලිවල තියාගෙන ඉන්නවා සුද්ද පවිත්‍ර කිරීමේ කටයුතු සඳහා,” යැයි හලීම් මහතා යළි සඳහන් කළේය.