අනුරාධපුර ඉපලෝගම ප්‍රාදේශීය ලේකම් කොට්ඨාසයට අයත් අලහප්පෙරුමාගම පිහිටි විජිතපුර බළකොටුවට අයත් බවට පැවසෙන ප්‍රදේශයක; මුස්ලිම් පල්ලියේ තාප්පයක් ඉදිකිරීමට කටයුතු කිරීම හේතුවෙන් පුරාවිද්‍යාත්මක වටිනාකමක් සහිත ගොඩනැඟිල්ලක නටඹුන්වලට දැඩි හානි සිදුවී ඇත.

අනුරාධපුර පුරාවිද්‍යා කාර්යාලයේ අවසරයකින් තොරව මෙම ඉදිකිරීම සිදුකර තිබුණ අතර සිද්ධිය සම්බන්ධයෙන් අනුරාධපුර කොට්ඨාස අපරාධ විමර්ශන ඒකකය ඊයේ (12) දින සැකකරුවන් 10 දෙනෙකු අත්අඩංගුවට ගත්තේය.

තාප්පය ඉදිකළ පල්ලියට යාබද නිවසක තිබී සොයාගත් ඇඹරුම්ගල, පුරාවිද්‍යාත්මක වටිනාකමක් සහිත සෙල්ලිපියක් බවට පොලීසිය සැකකරයි.

අත්අඩංගුවට පත් පිරිස අතර; අලහප්පෙරුමාගම මුස්ලිම් පල්ලි සංගමයේ සභාපතිවරයා, තාප්පය ඉදිකිරීමේදී කටයුතු කළ බැකෝ රථ රියදුරු ඇතුළු සහාය දැක්වූ පිරිසක් සහ එම නිවසේ හිමිකරු ද වන බව පොලීසිය පවසයි.

එම සැකකරුවන් හෙට (13) දින කැකිරාව මහෙස්ත්‍රාත් අධිකරණයට ඉදිරිපත් කිරීමට නියමිතය.