බණ්ඩාරගම මැදගම පරිපාලන මහජන සෞඛ්‍ය පරීක්ෂක එස්.යූ. මධුෂාන් මහතා පවසා සිටින්නේ; බණ්ඩාරගම අටලුගම ප්‍රදේශයේ ජීවත් වන විසි දහසෙන් පී.සී.ආර්. පරීක්ෂණසඳහා සහභාගිවී ඇත්තේ පුද්ගලයන් 1541 (8‍%)ක් බවත් ඉන් 547 ( 35%) දෙනකුට කොවිඩ් 19 ආසාදනය වී ඇති බවට තහවුරු වී ඇති බවත්ය.

පී.සී.ආර්. පරීක්ෂණ සඳහා සහභාගි වීම මග හැරීම නිසා පසුගිය බ්‍රහස්පතින්දා යුද හමුදාව ද මැදිහත්ව පුද්ගලයින් ඒ සඳහා යොමු කිරීමට ගත් උත්සාහයද ව්‍යර්ත වී ඇත. ඒ අනුව එම ප්‍රදේශයේ තවත් පුද්ගලයන් 18,459 දෙනකුගේ පී.සී.ආර්. පරීක්ෂණ සිදු කිරීමට ඇති බවත් ඔවුන් ඒ සඳහා සහභාගි කරවා ගැනීමට දැඩි වෙහෙසක් දැරීමට සිදුවන බවත් හෙතෙම කීවේය.

පසුගිය 10 වැනිදා අටලුගම ප්‍රදේශයේ පී.සී.ආර්. පරීක්ෂණ කිරීම සඳහා හාරසිය දෙනකු කැඳවා තිබුණද ඒ සඳහා පැමිණ ඇත්තේ පනස් දෙනකු පමණයි.

ඊට අමතරව පසුගිය 02 වැනිදා එම ප්‍රදේශයේ ආසාදිත පුද්ගලයකු රැගෙන ඒමට ගිය මහජන සෞඛ්‍ය පරීක්ෂකවරයකුට එම ආසාදිත පුද්ගලයා විසින් කෙළ ගැසීමේ සිද්ධියක් ද වාර්තා විය.

එම නිසා මෙම තත්ත්වය දිගින් දිගටම පැවැතියහොත් කළුතර දිස්ත්‍රික්කයේ දැඩි අවදානම් කලාපයක් විය හැකි බවද පරිපාලන මහජන සෞඛ්‍ය පරීක්ෂක වැඩිදුරටත් පැවසීය.