ලෝක වෙළඳ මධ්‍යස්ථානයේ නැගෙනහිර කුලුනේ 20,21,22 මහල් හා බටහිර කුලුනේ 22 වන මහලේ වර්ග අඩි 35,000ක් 2021 ජනවාරි 01 සිට 2022 දෙසැම්බර් 31දක්වා මාසික කුලිය රු.169,65,093.00ක මුදලට කුලියට ලබා ගැනීම සදහා වන කැබිනට් පත්‍රිකාවට කිසිම විරුද්ධත්වයකින් තොරව කැබිනට් මණ්ඩල අනුමැතිය ලැබී තිබේ.

එම දේපළ එසේ කුළියට ලබා ගැනීමට අදහස් කරන්නේ; අධිකරණ අමාත්‍ය මොහොමඩ් අලි සබ්‍රි මහතාගේ කාර්‍යාලය සහ අධිකරණ අමාත්‍යාංශය ලෝක වෙළඳ මධ්‍යස්ථානයට ගෙනයාම සඳහායි. ඒ සදහා රුපියල් කෝටි 41ක් ඉල්ලා ඉදිරිපත් කළ කැබිනට් පත්‍රිකාවටයි එම අනුමැතිය ලැබී තිබෙන්නේ.

ඒ අනුව වසර දෙකක් සඳහා රුපියල් මිලියන 400ක දැවැන්ත කුළියක් ගෙවමින් අධිකරණ  අමාත්‍යාංශය ලබන වසරේ ජනවාරි මස සිට ලෝක වෙළඳ මධ්‍යස්ථාන කුලුනේ පිහිටුවීමට කටයුතු සූදානම් වෙමින් පවතී.

රට ගොඩනැගීමට වියදම් අඩුකරන වැඩපිලිවෙලක් ක්‍රියාත්මක කරන බව පැවසූ ගෝඨාභය රාජපක්ෂ ජනාධිපතිවරයාගේ ආණ්ඩුව පුරවැසියන්ගේ බදු මුදල් යොදවා මෙතරම් දැවැන්ත කුළියක් ගෙවා පෞද්ගලික ගොඩනැගිල්ලකට අධිකරණ අමාත්‍යංශය ගෙනයාම මේ මොහොතේ ප්‍රමුඛතාවය දී කළ යුතු කටයුත්තක් දැයි? ජනතාව ප්‍රශ්න කරති.