මහ බැංකු බැඳුම්කර වංචාව සම්බන්ධයෙන් පවරා ඇති නඩුවේ පළමුවන විත්තිකරු වන හිටපු මහ බැංකු අධිපති අර්ජුන් මහේන්ද්‍රන් මහතා; උදර්පණ නීතිය යටතේ ශ‍්‍රී ලංකාවට උදර්පණය (පිටුවහල්) කර ගැනීම සඳහා සිංගප්පූරු රජය වෙත යැවීමට අවශ්‍ය පිටු 2100 කට අධික ලේඛන සහිත උදර්පණ ඉල්ලීම නීතිපතිවරයා විසින් පසුගිය වසරේ (2019) සැප්තැම්බර් 02 දා විදේශ කටයුතු අමාත්‍යාංශය හා අධිකරණ අමාත්‍යාංශය වෙත භාරදී තිබුණි.

ඒ අනුව ශ‍්‍රී ලංකා රජය විසින් විදේශ කටයුතු අමාත්‍යාංශය හා අධිකරණ අමාත්‍යාංශය හරහා; පසුගිය වසරේ (2019) නොවැම්බර් මස කර තිබූ එම ඉල්ලීම සිංගප්පූරුවේ නීතිපති දෙපාර්තමේන්තුව අධ්‍යයනය කරමින් පවතින බව මින් පෙර ශ‍්‍රී ලංකාවට දැනුම් දී තිබුණි.

එලෙස අධ්‍යයනය කිරීමෙන් අනතුරුව අර්ජුන් මෙහේන්ද්‍රන් සම්බන්ධයෙන් උදර්පණ නියෝග ලබා ගැනීම සඳහා; එරට සුදුසු අධිකරණයක් හමුවට ඉදිරිපත් කිරීමට පියවර ගන්නා බව ද එරට නීතිපති දෙපාර්තමේන්තුව විසින් ශ‍්‍රී ලංකාවට දැනුම් දී තිබූ නමුත්, ඒ සම්බන්ධයෙන් නිශ්චිත පිළිතුරක් මේ දක්වාම නොලැබීම නිසා ඊයේ (4) දින පස්වරුවේ ඒ පිළිබඳව පැහැදිලි කිරීමක් සිංගප්පූරු නීතිපතිවරයා වෙත යැවීමට, නීතිපති දප්පුල ද ලිවේරා මහතා පියරව ගත් බව වාර්තාවේ.

අර්ජුන් මහේන්ද්‍රන් ඇතුළු විත්තිකරුවන් 10 දෙනෙකුට එරෙහිව නීතිපතිවරයා විසින් අධිචෝදනා 23 ක් යටතේ බස්නාහිර පළාත්බද පළමු ස්ථිර ත‍්‍රිපුද්ගල මහාධිකරණ විනිසුරු මඬුල්ල හමුවේ පසුගිය වසරේ ජුනි 28 වැනිදා නඩු පවරා තිබුණි.

එම විත්තිකරු අධිකරණයට ගෙන්වා ගැනීම සඳහා අවශ්‍ය වරෙන්තු නියෝග නීතිපතිවරයාගේ ඉල්ලීම පරිදි විනිසුරු මඬුල්ල විසින් පසුගිය වසරේ (2019) අගෝස්තු 9 දා නිකුත් කර තිබුණි.

අර්ජුන් මහේන්ද්‍රන් මෙරටට පිටුවහල් කිරීමේ ඉල්ලීම සිංගප්පූරු රජය විසින් මෙතෙක් ඉටුකර හෝ ප‍්‍රතික්ෂේප කර නොමැති බවද නීතිපති දප්පුල ද ලිවේරා මහතා විසින් ඊයේ (04) දින අධිකරණ අමාත්‍යාංශයේ ලේකම්වරයා වෙත ලිඛිතව දන්වා යවා ඇත.