‘කොවිඞ් 19’ හේතුවෙන් නිවෙස් ගත ස්වයං නිරෝධායනයට ලක් වන අයගේ කටයුතු නිරීක්ෂණය කිරීම සඳහා යාන්ත‍්‍රණයක් සකස් කිරීමට රජය පියවර ගෙන ඇත.

ක්ෂේත‍්‍ර නිලධාරීන්ගෙන් සමන්විත කණ්ඩායමක් මේ සඳහා පත්කර ඇත. නිවෙස්ගතව නිරෝධායනය වන පුද්ගලයන් එම කාර්ය නිසියාකාරව ඉටු කිරීම සොයා බැලීම මෙම නිලධාරීන්ගේ ප‍්‍රධාන අරමුණ වී තිබේ.

ග‍්‍රාම නිලධාරීන්, ආර්ථික සංවර්ධන නිලධාරීන්, සමෘද්ධි සංවර්ධන නිලධාරීන්, කෘෂිකර්ම පර්යේෂණ හා නිෂ්පාදන සහකාරවරුන් සහ පවුල් සෞඛ්‍ය සේවා නිලධාරීන් මේ සඳහා යොදවා ඇත. මීට අමතරව පොලිස් නිලධාරීන් ද යොදවා තිබේ. එසේම මෙම නිලධාරීන් සතියේ දවස් වෙන් වෙන්ව අදාළ නිරීක්ෂණ කටයුතු සඳහා යොදවා ඇති බව ජනාධිපති කාර්යාලය සඳහන් කරයි.

මේ අනුව සඳුදා ආර්ථික සංවර්ධන නිලධාරීන්, අඟහරුවාදා පොලිස් නිලධාරීන්, බදාදා කෘෂිකර්ම පර්යේෂණ හා නිෂ්පාදන සහකාර නිලධාරීන්, බ‍්‍රහස්පතින්දා ග‍්‍රාම නිලධාරීන්, සිකුරාදා සමෘද්ධි සංවර්ධන නිලධාරීන්, සෙනසුරාදා පවුල් සෞඛ්‍ය සේවා නිලධාරීන් සහ ඉරිදා මහජන සෞඛ්‍ය පරීක්ෂකවරුන් යොදවා ඇත.

නිරෝධායනය වන දින 14ක කාලයේ දී එක් නිලධාරියකුට නිවෙස් නිරීක්ෂණය කිරීමට දින දෙකක් වෙන් කර ඇති අතර, එම කාලයේදී නිරෝධායනය වන පවුලේ සාමාජිකයකු ආසාදිතයකු බවට හඳුනාගත හොත් එම නිවසේ අනෙකුත් සාමාජිකයන් ද එදින සිට තවත් 14 ක් නිරෝධායනය කිරීමට කටයුතු යොදා තිබේ. එසේම නිරෝධායන කටයුතු පිළිබඳව පසුදින නිරීක්ෂණය කිරීමට පැමිණෙන නිලධාරියාට ද දැන්වීම් කළ යුතුය.

මෙසේ පත්කර තිබෙන නිලධාරීන් නිරෝධායනය වන පුද්ගලයන් සිය නිවෙස්වලම රැුඳී සිටින බවට තහවුරු කරගත යුතුය. අභ්‍යන්තර ආරක්ෂක, ස්වදේශ කටයුතු හා ආපදා කළමනාකරණ රාජ්‍ය අමාත්‍යාංශ චක‍්‍රලේඛ අංක 21/2020 ප‍්‍රකාර ප‍්‍රාදේශීය කමිටුව මගින් මෙම ක‍්‍රියාවලිය අධීක්ෂණය කළ යුතු අතර, නියාමන කටයුතු සඳහා දිස්ත‍්‍රික් කමිටුවට බලය පවරා ඇත.