ගුරු වෘත්තිය සංගම් ඇතුළු සංගම් ගණනාවක් අද (23) දින පාසල් ආරම්භ කිරීමේ තීරණයට විරුද්ධත්වය පළ කර තිබුන ද, අද දින පාසල් ආරම්භ කිරීමට බළධාරීන් තීරණය කරන ලදී.

තමන්ගේ දරුවන්ව පාසල් යැවීම ආරක්ෂිත මදි යැයි දෙමාපියන් සිතන්නේ නම් කැමති තීන්දුවක් ගත හැකි බව කතානායක මහින්ද යාපා අබේවර්ධන මහතා ප්‍රකාශ කර සිටින අතර, අද දින ළමයින්ගේ පැමිණීම ඉතාම අඩු මට්ටමක තිබූ බව ද වාර්තා වෙයි.

මේ අතර; දෙරණ Big Focus වැඩසටහනට සහභාගී වෙමින් අධ්‍යාපන අමාත්‍යාංශ ලේකම් කපිල පෙරේරා මහතා සඳහන් කර සිටියේ, අද දිනයේ පාසල් ආරම්භ කරන්නේ කොරෝනා සමග එය සිදු කරන්නේ කෙසේදැයි අදහසක් ගැනීමට බවත්, දරුවකුට කොරෝනා වෛරසය ආසාදනය වුවහොත් රජයක් ලෙස තමන් එම වගකීම භාර ගන්නා බවත්ය. පාසැල් දිගටම වසාගෙන සිටියහොත් කිසිදු තක්සේරුවක් ලබා ගත නොහැකි බවත්, මෙමගින් ලැබෙන අත්දැකීම් සමග ඉදිරිය සකස් කර ගත හැකි බවත්ය.

බළධාරීන් මේ සූදානම් වන්නේ දරුවන්ගේ ජීවිත සමග සෙල්ලම් කිරීමට දැයි දෙමාපියන් සහ ගුරු වෘත්තිය සංගම් ඇතුළු අනෙකුත් සංගම් ප්‍රශ්ණ කර සිටී.