රජය විසින් පාර්ලිමේන්තුවට ඉදිරිපත් කර ඇති ආණ්ඩුක්‍රම ව්‍යවස්ථාවේ 20 වන සංශෝධන පනත් කෙටුම්පත අභියෝගයට ලක්කරමින් ගොනුකර ඇති පෙත්සම් අද (05) දිනයේදීත් සලකා බැලීමට නියමිතය.

පෙත්සම් සලකා බලන සිව්වන දිනය අද වන අතර අද දිනයෙන් පෙත්සම් සලකා බැලීම් අවසන් කෙරෙන බව වාර්තා වේ.

හෙට (06) දිනයේ දි මීට අදාළ ලිඛීත දේශන ඉදිරිපත් කිරීමට නියමිතව තිබේ.

ඒ අනුව ඉදිරියේ දී ශ්‍රේෂ්ඨාධිකරණයේ තීරණය කථානායකවරයා වෙත භාරදීමට නියමිතය.

20 වන ආණ්ඩුක්‍රම ව්‍යවස්ථා සංශෝධන පනත් කෙටුම්පත අභියෝගයට ලක්කරමින් ශ්‍රේෂ්ඨාධිකරණය හමුවේ පෙත්සම් 39ක් ගොනුකර තිබුණි.

අගවිනිසුරු ජයන්ත ජයසූරිය, බුවනෙක අළුවිහාරේ, සිසිර ද ආබෲ, ප්‍රියන්ත ජයවර්ධන සහ විජිත් මලල්ගොඩ යන මහත්වරුන්ගෙන් සමන්විත පංච පුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ මෙම පෙත්සම් සලකා බැලීම පසුගිය බදාදා ආරම්භ කෙරුණි.

ඒ අනුව අද දිනයේ දි නීතිපතිවරයා විසින් තවදුරටත් කරුණු දැක්වීමට නියමිතය.