දේශීය සිනමාව අන්තර්ජාතික කීර්තියට පත් කිරීමට සිය නිර්මාණ දායකත්වය සැපයූ ජේ‍යෂ්ඨතම ලාංකේය සිනමාකරුවා වන ආචාර්ය ලෙස්ටර් ජේම්ස් පීරිස් මහතාගේ වෛද්‍ය ප්‍රතිකාර කටයුතු ඇතුළු සෙසු වියදම් සඳහා රුපියල් ලක්ෂ 5ක විශේෂ මාසික දීමනාවක් ලබා දීමට ජනාධිපති මෛත්‍රිපාල සිරිසේන මහතා කටයුතු කර ඇත.

යුග මෙහෙවරක් ඉටුකළ යුග පුරුෂයකුට පමණක් පිරිනැමෙන මෙම විශේෂ මාසික දීමනාවට අදාළ ලිපි ලේඛන සහ අදාළ පළමු චෙක්පත ජනාධිපතිවරයා අතින් ඊයේ (5දා) ආචාර්ය ලෙස්ටර් ජේම්ස් පීරිස් මහතා වෙත පිරිනමා තිබේ.

ජාත්‍යන්තර කීර්තිධර මහා සිනමාවේදී ආචාර්ය ලෙස්ටර් ජේම්ස් පීරිස් මහතාගේ 99 වැනි ජන්ම දිනය ඊයේ (5දා) දිනට යෙදී තිබූ අතර ඒ නිමිත්තෙන් ඊයේ උදෑසන තිඹිරිගස්යාය පිහිටි ඒ මහතාගේ නිවෙස වෙත ගිය ජනාධිපතිවරයා සිය ජන්ම දින සුබ පැතුම්ද එක්කොට ඇත.

ආචාර්ය ලෙස්ටර් ජේම්ස් පීරිස් මහතා සහ සුමිත්‍රා පීරිස් මහත්මිය සමඟ එක්ව කේක් කපා ජන්ම දිනය සැමරීමටද ජනාධිපතිවරයා එක් වූ අතර ලෙස්ටර් ජේම්ස් පීරිස් මහතාගේ සුවදුක් විමසමින් සුහද කතාබහක නිරත වූ ජනාධිපතිවරයා ඒ මහතා වෙත නිදුක් නිරෝගී සුවයත් ප්‍රාර්ථනා කර තිබේ.