තීරණාත්ක මහ මැතිවරණයක් පැවැත්වෙන මේ මොහොතේ යාපනය ඉන්දීය නියෝජ්‍ය කොමසාරිස්වරයා හදිසියේම ත්‍රිකුණාමලයට පැමිණ හිටපු විපක්ෂ නායක සම්පන්දන් සමග හා විපක්ෂයේ තෝරාගත් අපේක්ෂකයන් පිරිසක් සමග පෙරේදා (20 වැනිදා) රාත්‍රි නිලාවෙලි හෝටලයක සාකච්ඡා කළේ කුමක්ද යන්න රටට වහාම හෙළිදරව් කළ යුතු යැයි හිටපු නියෝජ්‍ය ඇමැති සුසන්ත පුංචිනිලමේ (21 වැනිදා) මාධ්‍ය හමුවක් පවත්වමින් පැවැසීය.

මෙහිදී තවදුරටත් අදහස් දැක්වූ සුසන්ත පුංචිනිලමේ

‘‘ත්‍රිකුණාමලය දිස්ත්‍රික්කයේ මහජන නියෝජිතයකු ලෙස ආණ්ඩුව නියෝජනය කරමින් පාර්ලිමේන්තුවේ හිටපු අප සමග හෝ වෙනත් ප්‍රගතිශීලී අපේක්ෂකයන් සමග සාකච්ඡා නොකර දෙමළ ජාතික සන්ධාන නායක ආර්. සම්පන්දන් සමග පස්වරු 4.00 ඉඳලා ඔහුගේ ගෙදරත් ඉන් අනතුරුව රාත්‍රී 8.00 සිට 11.00 දක්වා දෙමළ සුළු පක්ෂ කීපයක තෝරාගත් අපේක්ෂකයන් කිහිපදෙනකු සමග නිලාවෙලි හෝටලයකදීත් සාකච්ඡා කරන්න ඉන්දීය මහ කොමසාරිස් කාර්යාලයේ නියෝජිතයන්ට මේ මොහොතේ පවතින අවශ්‍යතාව මොකක්ද? ඒ සාකච්ඡාවේ අන්තර්ගතය මොකක්ද ඇයි එහෙම රහසිගතව සාකච්ඡා කළේ කියලා රටට හෙළිදරව් කරන්න ඕන. මොකක්ද තානාපති කාර්යාලවලට මේ රටේ දේශපාලන කටයුතුවලට මැදිහත්වීමට තියෙන අයිතිය? මම මේ ගැන ජනාධිපතිවරයා හා ආරක්ෂක අංශ දැනුවත් කරලා තියෙනවා.’’ යැයි ද පැවැසීය.