නොපෙනන වයිරසයකට ප්‍රජාතන්ත්‍රවාදය ලොක්ඩවුන් කිරීමට ඉඩ නොතබන බව පිවිතුරු හෙළ උරුමයේ නායක නීතිඥ උදය ගම්මන්පිල පැවසීය.

ඔහු මේ බව ප්‍රකාශ කළේ කෝට්ටේ පිහිටි එම පක්ෂ කාර්යාලයේ ඊයේ (14 වැනිදා) පැවති මාධ්‍ය හමුවකදීය. එහිදී වැඩිදුරටත් අදහස් දැක්වූ හෙතෙම මෙසේ ද පැවසීය.

” මැතිවරණ කල් දාන්නේ ලෝකය කැරකෙන එක නැවතුණොත් විතරයි කියලා මැතිවරණ කොමිසමේ සභාපති අභීත ප්‍රකාශයක් කර තිබෙනවා. අපි එතුමාගේ නිර්භීතකම අගය කරනවා. කොරෝනා වසංගතය මැද අප්‍රේල් 15 කොරියාවත්, ජූලි 10 සිංගප්පූරුවත් පාර්ලිමේන්තු මැතිවරණය පැවැත් වූවා. ඒ රටවල් ආදර්ශයට ගෙන අපිත් අගෝස්තු 5 මැතිවරණය පැවැත්විය යුතුයි. ජුනි 20 මැතිවරණය පැවැත් වූවා නම් අදට වඩා යහපත් වාතාවරණයක ඡන්ද විමසීම පවත්වලා ස්ථාවර පාර්ලිමේන්තුවක් බිහිකරගෙන කොරෝනා වසංගතයට සාර්ථකව මුහුණ දෙන්න තිබුණා.’’