ශ්‍රී ලංකාවට පැමිණීමට නොහැකිව සිංගප්පූරුවේ රැදී සිටි ශ්‍රී ලාංකිකයන් 291 දෙනෙකු රැගෙන ශ්‍රී ලන්කන් ගුවන් සේවයේ විශේෂ ගුවන් යානයක් අද (2) කටුනායක ගුවන් තොටුපළ වෙත පැමිණි අතර ඔවුන් සියලු දෙනා පී.සී.ආර් පරීක්ෂණ සඳහා යොමු කිරීමට පියවර ගෙන ඇත.

ඔවුන් අද (02) දින සවස 4.15 ට සිංගප්පූරුවේ සිට පැමිණි ශ්‍රී ලන්කන් ගුවන් සේවයේ යූ.එල්.- 303 දරන විශේෂ  ගුවන් යානයෙන් කටුනායක ගුවන් තොටුපළ වෙත පැමිණ තිබුණි.

මෙම ගුවන් මගීන් පිරිස ගුවන් තොටුපළ පර්යන්ත ගොඩනැඟිලි තුළට ගැනීමට විශේෂ කවුන්ටර 08 ක් සුදානම් කර ඇත.

මෙම ගුවන් මගීන් පිරිස සහ ගුවන් නියමුවන් ඇතුළු ගුවන් යානා කාර්යය මණ්ඩලය ගුවන් තොටුපළ තුළදීම පී.සී.ආර්. පරීක්ෂණ සඳහා යොමු කිරීමට විශේෂ වැඩපිළිවෙළක් ගුවන් තොටුපළ සහ සෞඛ්‍ය බලධාරීන් විසින් සකස් කර තිබේ.

ඒ අනුව මෙම ගුවන් යානා කාර්යය මණ්ඩලය කොළඹ පෞද්ගලික රෝහලක සහායෙන් සහ පැමිණි ගුවන් මගීන් ගුවන් තොටුපළ සෞඛ්‍ය වෛද්‍ය ඒකකයේ සහ රජයේ රෝහල් කාර්යය මණ්ඩලයක් විසින් පී.සී.ආර්.පරීක්ෂණ සඳහා යොමු කර ඇත.

ලබා ගන්නා සෙම පටල සාම්පල  ලබා ගැනීමෙන් අනතුරුව ඉදිරි පරීක්ෂණ සඳහා, විශේෂ ගිලන් රථයක් මඟින් කොළඹ වෛද්‍ය පර්යේෂණ ආයතනය වෙත යොමු කිරීමට නියමිතය.

මෙසේ පැමිණි ගුවන් මගීන් පී.සී.ආර්.පරීක්ෂණ වලට ලක් වීමෙන් අනතුරුව , ඒවායේ ප්‍රතිඵල ලැබෙන තෙක්, ගුවන් තොටුපළ අවට හෝටල් 04 ක නවාතැන් ගැනීමට සලස්වා තිබේ.