සහල් පාලන මිල පැනවීමේදී මෝඩකමක් නොවේ නම් කුමන්ත්‍රණයක් සිදුවී ඇති බවට ජාතික සංවිධාන විසින් ප්‍රභල මතයක් ගොඩ නැගූ බැවින් විදුර වික්‍රමණායක මහතා විසින් ආණ්ඩුව සහල් මාෆියාවට පරාජය වූ බවට සිදුකළ ප්‍රකාශය පිළිබඳව ලංකා ලීඩ් ජාතික සංවිධාන මතය විමසන ලදී.

මේ වසන්ත බණ්ඩාර මහතා ඊට ලබාදුන් පිළිතුර ඔහුගේ වචනයෙන්,

” මෝඩකමක් ලෙස හෝ කුමන්ත්‍රණයක් ලෙස හෝ කුමන ආකාරයකට හැඳින්වුවත් අප්‍රේල් 20 දින ගැසටුව මඟින් පැනවූ සහල් මිල මඟින් සහල් කර්මාන්තයට පමණක් නොව වී ගොවියාට ද බරපතල අර්බුදයකට මුහුණ දීමට සිදු වෙනවා. ගොවියාට රුපියල් 50 ක් ගෙවිය හැකි සහ කර්මාන්තයට පැවතිය හැකි මිලක් සහල් වලට නියම කළ යුතුයි කියන එක ඕනෑම බත් කන අයෙකුට තේරුම්ගත හැකියි. ජනාධිපතිතුමා කලේ වරද නිවැරදි කරන එක. ඒක වෘත්තීය සමිති වැටුප් වැඩි කරන ලෙස වර්ජනය කරන විට අතරමැදි ගානකට එකඟ වෙලා වැඩේ බේරගන්නවා වගේ දෙයක් නොවේ. රටේ ආහාර සුරක්ෂිතතාවයට, ගොවීන්ගේ ජිවිතවලට, ග්‍රාමීය ආර්ථිකයට සහ කුඩා සහ මධ්‍යම පරිමාන කර්මාන්තකරුවන්ගේ පැවැත්මට අදාළ ජාතික ප්‍රශ්ණයක් විසඳිම පරාජයක් ලෙස හැඳින්වීම බරපතල පටලවා ගැනීමක්. ”