ඕස්ට්‍රේලියාවේ සිටින ශ්‍රී ලාංකික ව්‍යවසායකයෙකු සභාපතිත්වය දරන TBG Biotechnology Corp සමාගම විසින් නිෂ්පාදනය කරන ලද කොවිඩ් 19 වෛරස පරීක්ෂණ කට්ටල දෙකක් වෙනුවෙන් අන්තර්ජාතික අනුමැතිය හිමිව ඇත. යුරෝපීය ආර්ථික බලප්‍රදේශයේ විකුණනු ලබන නිෂ්පාදන සඳහා සෞඛ්‍ය, ආරක්ෂාව සහ පාරිසරික ආරක්ෂණ ප්‍රමිතීන්ට අනුකූල බව පෙන්නුම් කරන සහතික කිරීමේ ආයතනයක් වන CE Mark හි අනුමැතිය මෙලෙස හිමිව ඇත්තේ ශ්‍රී ලාංකික ව්‍යවසායකයකු වන ජිටෝ අරුනම්පලම්ට අයත් සමාගම විසින් නිපදවූ ExProbe SARS-CoV-2 Testing Kit සහ SARS-CoV-2 lgG/lgM Rapid TestKit පර්‌යේෂණ කට්ටල දෙක සඳහාය.

මෙම පරීක්ෂණ කට්ටල දෙක එක්ව, ක්‍රියාකාරී SARS-CoV-2 වෛරස් ආසාදනයක් ඇති රෝග ලක්ෂණ සහ SARS-CoV-2 ආසාදනය වී නිශ්චිත ප්‍රතිදේහයක් ජනනය කළ ආසාදිතයින් සනාථ කිරීමට හැකි වනු ඇතැයි අපේක්ෂා කෙරේ. මිනිත්තු 15ක් වැනි කාලයක් තුළ දී මෙම පරීක්ෂණය සම්පූර්ණ කිරීමට හැකි බව සමාගම පවසයි. මේ අතර TBG Biotechnology COrp විසන් මෙම පර්යේෂණ කට්ටල ශ්‍රී ලංකාවේ දී නිෂ්පාදනය කිරීම සඳහා මේ වන විට අවධානය යොමු කර ඇති අතර ඒ සඳහා මෙරට කර්මාන්ත ශාලාවක් ආරම්භ කිරීමේ හැකියාව සොයා බැලීමට කටයුතු යොදා ඇති බවද වාර්තා​ වේ.