ඇමෙරිකා එක්සත් ජනපද ජනාධිපති ඩොනල්ඩ් ට්‍රම්ප් සහ එම පරිපාලනය ‘නව කොරෝනා වයිරසය’ හෙවත් ‘කොවිඩ්-19’ ගෝලීය වසංගතයට ප්‍රතිචාර දැක්වූ ආකාරය විවේචනය කරමින් එරට සිවිල් හා දේශපාලන සහ වැසියෝ පිරිසක් එකතු වී ඊයේ (20) ධවල මන්දිරය ඉදිරියේදී විරෝධතාවක නිරත වූහ.

මළමිනී දැමූ කළු පැහැති බෑග්වලට සමාන අනුරූ සකසමින් ඒවා වොෂින්ටනයේ ලෆායට් චතුරශ්‍රය ඉදිරියේ බිම අතුරමින් ඔවුහු එලෙස විරෝධතාවයේ නිරත වූහ.

‘‘ජනාධිපතිවරයා තවත් මිනීවල් කීයක් හාරනවාද ?’’ යනුවෙන් ඇතැම් විරෝධතාකරුවෝ එහිදි ප්‍රශ්න කළ අතර ඇතැම්හු ‘‘ට්‍රම්ප්ගේ අසාර්ථකත්වය අපේ අහිමි වීම’’ යනුවෙන් දැක්වෙන විරෝධතා පුවරු බිම ඇතුරූහ.

මළමිනී දැමූ කළු පැහැති බෑග්වලට දැමූ අනුරූ බිම ඇතිරූ විරෝධතාකරුවෝ ධවල මන්දිරයේ ඉදිරියේ ව්‍යාජ අවමංගල්‍ය උත්සවයක් ද පැවැත්වූහ. ඇතැම් හු කළු පැහැති බෑග් ආසන්නයේ සුදු පැහැති රෝස මල් ද තැබූහ.

‘‘ශෝක වීමේ දිනය’’ යනුවෙන් මෙම දිනය නම් කර තිබූ අතර මෙම විරෝධතාවට ඇමෙරිකාවේ සිවිල් සහ දේශපාලන සංවිධාන රැසක් මෙන්ම එරට වැසියෝ ද සහභාගී වී සිටියහ.

ඇමෙරිකා එක්සත් ජනපදයෙන් අද (21) පස්වරු වනවිට කොරෝනා ආසාදිතයන් 15,57,727ක් හඳුනාගෙන තිබූ බවත් කොරෝනා ආසාදිත මරණ 93,313ක් වාර්තා වී තිබූ බව රොයිටර් පුවත් සේවය වාර්තා කර තිබිණි.

ඡායාරූප – ඒ.එෆ්.පී.