රුසියානු ජනාධිපති ව්ලැදිමිර් පුටින් වැඩිම කාලයක් එරට පාලනය කළ නායකයා ලෙස වාර්තාවක් පිහිටුවාවිද? මෙය මේ දිනවල බොහෝ විට කතාබහට ලක්වන කාරණයක් බවට පත්ව තිබෙන්නේ රුසියානු ජනාධිපතිවරණ උණුසුමද ඉහළ යමින් ඇති පසුබිම තුළය.

ජනාධිපතිවරණය පැවැත්වෙන්නේ අද (18දා) ය. පුටින් ඒ සඳහා ඉදිරිපත් වන ප්‍රධානම අපේක්ෂකයා වෙයි. මෙවර පුටින් ජනාධිපති පදවිය සඳහා ඉදිරිපත් වන්නේ සිවුවැනි වතාවට වීම කැපී පෙනෙන කාරණාවකි. ඔහු පළමු වතාවට ජනාධිපති තරගයට ඉදිරිපත් වූයේ 2000 වසරේය. ඉන්පසු 2004 දී සහ 2012 දී ජනාධිපතිවරණවලට තරග කර ජය ගත්තේය. 2008 වසරේ පැවැති ජනාධිපතිවරණයට ඔහු ඉදිරිපත් නොවූ අතර එයට හේතු වූයේ පිට පිට තුන්වරක් එම ධුරය සඳහා ඉදිරිපත් වීමට එරට ව්‍යවස්ථාව අනුව හැකියාවක් නොමැති වීමයි. එවර ජනාධිපති ධුරයට පත් වූයේ පුටින්ගේ සමීපතම විශ්වාසවන්තයකු වූ දිමිත්‍රි මෙද්වදෙව්ය. නමුත් එම අවස්ථාවේදීද සැබැවින්ම රට මෙහෙයවූයේ පුටින් බව බොහෝ දෙනාගේ පිළිගැනීමයි. කෙසේ හෝ වේවා මේ අනුව ඔහු මේ වන විට වසර 14ක් රුසියාවේ ජනාධිපතිවරයා ලෙස කටයුතු කර තිබේ.