රී ලංකා සුරැකුම්පත් හා විනිමය කොමිෂං සභාව අද (19) උදෑසන කොළඹ කොටස් වෙළෙඳපොළ අධ්යක්ෂ මණ්ඩලය හා කොළඹ කොටස් තැරැව්කරුවන්ගේ සභාපතිවරයා සමඟ විශේෂ හමුවක් පවත්වා තිබේ. මෙහිදී රජය විසින් ප්රකාශයට පත් කරනු ලබන ‘රජයේ නිවාඩු දිනවල‘ දී කොටස් වෙළෙඳපොළ විවෘත නොකිරීමට තීරණය කර ඇත.

මේ අතර මහජන සේවාවන් අඛණ්ඩව පවත්වාගෙන යාම රජයේ වගකීමක් වන බැවින් සහ ජනතාව එක්රැස් වීම වැළැක්වීම සඳහා ගනු ලබන පියවරක් වශයෙන් රජයේ අමාත්යාංශ, දෙපාර්තමේන්තු, සංස්ථා හා ව්යවස්ථාපිත ආයතන දුරස්ථ ක්රමවේදයක් අනුගමය කරමින් 2020 මාර්තු මස 20 දින සිට 27 දින දක්වා සිය කාර්යාලයීය රාජකාරී ඉටුකිරීම අපේක්ෂා කරන බවත්, ඉදිරියේ දී තෝරා ගත් යම් රාජ්ය සේවාවන් දුරස්ථ ක්රමවේදය යටතේ ක්රියාත්මක කිරීමට මෙම අත්දැකීම පාදක කරගැනීමට ද අපෙක්ෂා කරන බවත්, 2020 මාර්තු 21 හා 22 දෙදින හැරෙන්නට සෙසු දින මෙහිදී රජයේ නිවාඩු දින සේ නොසලකන බවත්, රජය වැඩිදුරටත් කියා සිටී.

මෙම තත්ත්වය තුළ රජයේ නිවාඩු දින ලෙස ප්රකාශයට පත් කර නොමැති ඉදිරි දින කිහිපය තුළ කොටස් වෙළෙඳපොළ කටයුතු පවත්වාගෙන යනවා ද නැද්ද යන තීරණය ශ්රී ලංකා සුරැකුම්පත් කොමිසමේ හා කොටස් වෙළෙඳපොළ බලධාරීන් විසින් අද පස්වරුවේ දී ගැනීමට නියමිත බව අද දෙරණ වෙත වාර්තා වේ.

කෙසේ වෙතත් අද දෙරණ වෙත අදහස් දැක්වූ කොළඹ කොටස් වෙළෙඳපොළ තැරැව්කාර සමාගමක ආයෝජන උපදේශකවරයෙකු කියා සිටියේ, පසුගිය දින 4ක කාලය තුළ, කොටස් වෙළෙඳපොළ ගනුදෙනු සඳහා විවෘත නොකිරීමෙන් දිනකට ඒකක 200 බැගින් සියලු කොටස් මිල දර්ශකය පහළ යාම වළක්වා ගැනීමට හැකි වූ බවයි. පවතින ගෝලීය ආර්ථික පසුබිම තුළ ලොව සියලු කොටස් වෙළෙඳපොළ මේ වන විට කඩා වැටී ඇති බවත්, හැකිනම් තවදුරටත් කොළඹ කොටස් වෙළෙඳපොළ දින කිහිපයකට හෝ වසා දැමීමට කටයුතු කරන්නේ නම් එය හොඳ තීරණයක් වනු ඇති බවත් ඔහු වැඩිදුරටත් පැවසීය.