එක්සත් ජාතීන්ගේ මානව හිමිකම් කවුන්සලය ඉදිරිපත් කළ යෝජනාවන් දෙකකින් ඉවත් වීමට වර්තමාන රජය කටයුතු කළද, එක්සත් ජාතීන්ගේ සංවිධානයේ මානව හිමිකම් කවුන්සලයේදී ඒ වෙනුවෙන් වගකීමට රජයට සිදුවන බව දෙමළ ජාතික සන්ධාන නායක ආර්. සම්බන්ධන් පවසයි.

සම්බන්ධන් මහතා වැඩිදුරටත් පැවසුවේ මෙරට අවසන් යුද සමයේ සිදුවූ මානව හිමිකම් කඩවීම සම්බන්ධයෙන් ජාත්‍යන්තර ජිනීවා මානව හිමිකම් කවුන්සලයේදී රජය එකඟ වූ 30/1 යෝජනාව ඇතුළු යෝජනාවන් දෙකකින් ඉවත්වීමට වර්තමාන රජය සූදානම් බවට ප්‍රකාශ කොට ඇති බවයි.

රජයේ කැමැත්ත මත රජය අදාළ යෝජනාවන්ගෙන් ඉවත් වුවද 2015 වසරේදී රජය එකඟ වී ඇති එකඟතා මත අදාළ යෝජනාවන් ක්‍රියාත්මක කිරීමට සිදුවනු ඇති බවද දෙමළ ජාතික සන්ධාන නායකයා ප්‍රකාශ කරයි. සම්බන්ධන් මහතා වැඩිදුරටත් පැවසූවේ 2015 දී ජාත්‍යන්තර මානව හිමිකම් කවුන්සලයේදී එකඟ වූ යෝජනාවන් ක්‍රියාවට නැංවීම වෙනුවෙන් 2017 වසරේදී, 2019 වසරේදීද රජයන් එකඟ වී ඇති බවයි.

මෙරට රජය යුද සමයේ උතුරු නැගෙනහිර සිදුවූ යුද අපරාධ වෙනුවෙන් සාධාරණය ඉටු කිරීම සම්බන්ධයෙන් ජාත්‍යන්තර මානව හිමිකම් සංවිධානය අවධානයෙන් පසුවන බැවින් රජයට ඒ වෙනුවෙන් සාධාරණය ඉටු කිරීමට සිදුවනු ඇති බවද සම්බන්ධන් මහතා කීය.