මැදපෙරදිග කලාපයේ ඉරානය සහ සෞදි අරාබිය අතර ඇතිවන යුද්දයකින් ඇතිවන බලපෑම කලාපීය ජනයාට දරාගත හැකි යුද්දයක් නොවන බව පකිස්තාන අගමැති ඉම්‍රාන් ඛාන් මහතා පවසයි. ජර්මානු වෙබ් පුවත් අඩවියක් සම්ඟ සම්මුඛ සාකච්ඡාවකට සහභාගිවෙමින් ඒ මහතා මේ බව ප්‍රකාශ කර සිටියේය. සෞදි අරාබිය පකිස්තානයේ වැදගත්ම මිතුරෙකු ලෙස සලකා ගනුදෙනු කරන අතරතුර ඉරානය සමඟ හොඳ මිතුරු සම්බන්ධතාවයක් පවත්වා ගෙනයාමට ප්කිස්තානයට හැකිවී ඇතිබව පවසන පකිස්තානු අගමැතිවරයා කලාපයේ බලවතුන් වීමට තරඟයක නිරතවන තම මිතුරන්ගේ කිසිදු පාර්ශවයක් සමඟ එක් නොවන බවද වෙබ් අඩවියට කරුනු දක්වමින් අවධාරණය කර සිටියේය.

අමෙරිකානු ඩ්‍රෝන ප්‍රහාරයකින් ජීවිතක්ෂයට පත්වූ ඉරානයේ ඉහළම හමුදා නිළධාරියා වූ සොල්මෙනි මහතාගේ මරණයෙන් පසු ඉරානය, ඉරාකයේ පිහිටි අමෙරිකානු යුද කඳවුරු ඉලක්ක කරගනිමින් ගුවන් ප්‍රහාර එල්ල කළ අතර සෞදි අරාබියටද ප්‍රහාර එල්ල කරන බවට තර්ජනය කළේය. මේ සම්බන්ධයෙන් දෙපාර්ශවය සමඟම සාකච්ඡාවේ නිරතවුනු ඉම්‍රාන් ඛාන් මහතා උනුසුම් තත්වය පාලනය කිරීමට යහපත් උත්සාහයක් ගනු ලැබීය. පකිස්තානු අගමැතිවරයාගේ මැදිහත්කරුවෙකුගේ භූමිකාව තවත් තීව්‍ර කරමින් පකිස්තානු විදේශ ඇමති මොහොමඩ් කුරේශි මහතාට සෞදි අරාබි නායකයන් මෙන්ම ඉරාන නායකයන්ද හමුවී සාකච්ඡා ආරම්භ කරන ලෙස උපදෙස් දී ඇත. පකිස්තානය දෙපාර්ශවය සමඟ සාකච්ඡා කිරීමේදී “පකිස්තානය සාම සාධනයේ භූමිකාව රඟ දක්වනු මිස නැවත කිසිදු යුද්දයක පාර්ශවකරුවෝ නොවන්නෙමු”යන තේමාපාඨය අනුව කටයුතු කරන බව පකිස්තානු අගමැතිවරයා අවධාරණය කළේය.