අග්‍රාමාත්‍ය මහින්ද රාජපක්ෂ මහතාගේ ජ්‍යෙෂ්ඨ ආර්ථික උපදේශක වශයෙන් ශ්‍රී ලංකා මහ බැංකුවේ හිටපු අධිපතිවරයකු වන අජිත් නිවාඩ් කබ්රාල් මහතා පත් කරනු ලැබ ඇත.

ජනාධිපති ගෝඨාභය රාජපක්ෂ මහතාගේ ප්‍රධානත්වයෙන් ජනාධිපති කාර්යාලයේ අද (27) පැවැති පළමු කැබිනට් හමුවේදී අජිත් නිවාඞ් කබ්රාල් මහතා එම තනතුරට පත් කිරීමට අනුමැතිය හිමි ව තිබේ.

අජිත් නිවාඞ් කබ්රාල් මහතා ශ්‍රී ලංකා මහ බැංකුවේ 12 වැනි අධිපතිවරයා වන අතර 2006 වසරේ සිට 2015 වසර දක්වා එම ධුරය හෙබවූවේය.

වරලත් ගණකාධිකාරීවරයකු වන හෙතෙම ශ්‍රී ලංකා වරලත් ගණකාධිකාරී ආයතනයේ හා දකුණු ආසියානු ගණකාධිකාරීවරුන්ගේ සම්මේලනයේ හිටපු සභාපතිවරයකු වේ.

ශ්‍රී ලංකා මහ බැංකුවේ අධිපති ධුරයට පත්වීමට පෙර කබ්රාල් මහතා ආර්ථික කටයුතු පිළිබඳ උපදේශකවරයකු ලෙස ද කටයුතු කර ඇති අතර  සමාගම් ගණනාවක සභාපති සහ අධ්‍යක්ෂ යන තනතුරු හොබවා ඇත.

සුරැකුම්පත් හා විනිමය කොමිෂන් සභාව, ව්‍යාපාර කළමනාකරණය පිළිබඳ ජාතික ආයතනය, පශ්චාත් උපාධි කළමනාකරණ ආයතනය හා මොරටුව විශ්ව විද්‍යාලය යනාදියේ අධ්‍යක්ෂ මණ්ඩලවල කටයුතු- කර ඇති කබ්රාල් මහතා ඇමෙරිකා එක්සත් ජනපදයේ අයිසන්හවර් පදනමේ ‘2000 මල්ටි-නේෂන්’ වැඩසටහනේ අධි ශිෂ්‍යත්වලාභියෙකි.