රසායනික පොහොර නොමිලේ ලබාදෙන බවට ජනාධිපතිධුර අපේකෂකයින් පොරොන්දු ලබාදුන්නද රටේ ප්‍රතිපත්තිය වියයුත්තේ රසායනික පොහොර භාවිතයෙන් ඉවත්වීම බව ජනාධිපති මෛත්‍රීපාල සිරිසේන මහතා පවසයි.

අඹන නව නගරය ජනතා අයිතියට පවරාදීමේ උත්සවයට අද(07) එක්වෙමින් ජනාධිපතිවරයා මේබව සඳහන් කළේය.

මෙහිදී අදහස් දැක්වු ජනාධිපතිවරයා පවසා සිටියේ, මේ දිනවල රටේ මැතිවරණයක් පවතින වේලාවක් බවයි.

මැතිවරණයට ඉදිරිපත් වී සිටින ප්‍රධාන පක්ෂ දෙකේම අපේක්ෂකයින් ජනතාවට රසායානික පොහොර නොමිලේ දෙන බවට පොරොන්දු ලබා දෙන බව තමාට ඇසුන බවද මෙහිදී ජනාධිපතිවරයා පැවසීය. කෙසේ වෙතත් පොහොර නොමිලේ ලබාදෙන මැතිවරණ පොරොන්දු වලට තමන් විරුද්ධ බව ජනාධිපති මෛත්‍රීපාල සිරිසේන මහතා පවසා සිටියේය.

රසායනික පොහොරවලින් බැහැර වී කාබනික පොහොර කෘෂිකර්මාන්තයට පාවිච්චි කිරීමේ ප්‍රතිපත්තියකට යා යුතු බව තමාගේ දර්ශනය වන බවත් ජනාධිපතිවරයා මෙහිදී කියා සිටියේය.

රසායනික පොහොර භාවිතා කරන ලෝකයේ රටවල් මොනවාදැයි ප්‍රශ්න කර සිටි ජනාධිපතිවරයා, ගොවීන්ට නොමිලේ ලබා දීමට රසායානික පොහොර පිටරටින් ගෙන්වන්නේ නම් ඒ එක්කම වකුගඩු නැව්වලින් ගෙන්විය යුතු බවද ජනාධිපතිවරයා මෙහිදී අවධාරණය කළේය.