ජනාධිපතිවරණයේදී සහාය ලබාදෙන අපේක්ෂකයා සම්බන්ධයෙන් අවසන් තීරණයක් ගැනීම සඳහා උතුරේ දේශපාලන පක්ෂ නියෝජිතයන් අතර ඊයේ (30 වැනිදා) පස්වරුවේ පැවැති සාකච්ඡාව එකඟතාවකින් තොරව අවසන් විය.

ජනාධිපතිවරණයේ තැපැල් ඡන්ද විමසීම ආරම්භ වන අද (31 වැනිදා) දින තැපැල් ඡන්ද දායකයන්ට ස්වාධීන ඡන්දය ප්‍රකාශ කිරීමට අවස්ථාව ලබාදීමට දෙමළ දේශපාලන පක්ෂ තීරණය කර ඇත. නමුත් නව ප්‍රජාතන්ත්‍රවාදී පෙරමුණේ ජනාධිපති ධුර අපේක්ෂක සජිත් ප්‍රේමදාස අද (31 වැනිදා) සිය ප්‍රතිපත්ති ප්‍රකාශය ඉදිරිපත් කිරීමෙන් පසු ජනාධිපතිවර‍ණයේදී සහය පළ කරන අපේක්ෂකයා තීරණය කිරීම පසුව සිදුකරන බව උතුරේ දෙමළ දේශපාලන පක්ෂ සඳහන් කරයි.

යාපනයේ පෞද්ගලික හෝටලයකදී මෙම සාකච්ඡාව ඊයේ (30 වැනිදා) පස්වරුවේ පැවැත්විණි. දෙමළ ජනතා සන්ධානයේ නායක සී.වී. විග්නේෂ්වරන් පමණක් මෙම සාකච්ඡාවට එක්ව සිටියේ නැත. ඔහු පෙරේදා (29 වැනිදා) නිවේදනයක් නිකුත් කරමින් ප්‍රකාශ කළේ උතුරේ දෙමළ දේශපාලන පක්ෂ ඉදිරිපත් කළ කොන්දේසි 13 නොපිළිගැනීම නිසා සිංහල ජනාධිපති ධුර අපේක්ෂකයන්ට ඡන්දය ලබානොදිය යුතු බවයි.

දෙමළ ජනතා සන්ධානයේ නායක සී.වී. විග්නේෂ්වරන් ජනාධිපති මෛත්‍රිපාල සිරිසේන වෙත ඊයේ (30 වැනිදා) ලිපියක්ද යොමු කර ඇත. මීළඟ පොහොය දිනයේදී දෙමළ දේශපාලන සිරකරුවන් මුදාහැරීමට කටයුතු කරන ලෙස එම ලිපියෙන් ඉල්ලා තිබේ.