ශ්‍රී ලංකා නිදහස් පක්ෂයෙන් බිහි වූ ජනාධිපතිවරුන් වන මෛත්‍රිපාල සිරිසේනගේ සහ මහින්ද රාජපක්ෂගේ රුව නොමැතිව, බණ්ඩාරනායකවරුන්ගේ රුව සහිත ලිපියක් ශ්‍රී ලංකා නිදහස් පක්ෂය සුරැකීමේ සංවිධානය විසින් සියලුම ආසන සංවිධායකවරුන් වෙත ඊයේ (30 වැනිදා) යොමු කර තිබේ.

පාර්ලිමේන්තු මන්ත්‍රී කුමාර වෙල්ගමගේ අත්සනින් යුතුව මෙම ලිපිය යොමු කර ඇත.

හිටපු අග්‍රාමාත්‍යවරුන් වන එස්.ඩබ්ලිව්.ආර්.ඩී. බණ්ඩාරනායක, සිරිමාවෝ බණ්ඩාරනායක සහ හිටපු ජනාධිපතිනි චන්ද්‍රිකා බණ්ඩාරනායකගේ රුව පමණක් එම ලිපියේ සඳහන්ව තිබේ. මොවුන් තිදෙනාද ශ්‍රී ලංකා නිදහස් පක්ෂයෙන් බිහි වූ නායකයන් වෙයි.

‘පවුල්වාදි ෆැසිස්ට්වාදයෙන් මාතෘභූමිය රැකගමු’ යන තේමාව යටතේ නිකුත් කර ඇති ලිපියෙන් ලබන මස 5 වැනිදා කොළඹ සුගතදාස ක්‍රීඩාංගණයේ පැවැත්වෙන රැලියකට සහභාගි වන ලෙස ආසන සංවිධායකවරුන්ට ආරාධනා කර තිබේ.

ශ්‍රී ලංකා නිදහස් පක්ෂය කුමන්ත්‍රණකරුවන්ගෙන් බේරා ගැනීම සඳහා රැලිය පැවැත්වෙන බව පාර්ලිමේන්තු මන්ත්‍රී කුමාර වෙල්ගම ලිපියේ සඳහන් කර ඇත.

රැලියට සහභාගිවීම සඳහා හිටපු ජනාධිපතිනි චන්ද්‍රිකා බණ්ඩාරනායක ලන්ඩන් නුවර සිට පෙරේදා (29 වැනිදා) දිවයිනට පැමිණියාය.