රුසියානු සංචාරකයන් 25,000 ක් මේ මස සිට , 2020 අප්‍රේල් මාසය දක්වා වූ හය මාසයක කාළයක් තුළ ශ්‍රී ලංකාවට රැගෙන ඒමේ විශේෂ ව්‍යාපෘතියක් කටුනායක බණ්ඩාරනායක ජාත්‍යන්තර ගුවන් තොටුපළ මුල් කර ගනිමින් ආරම්භ කර ඇති බව වාර්තා වේ.

ඒ අනුව ප්‍රථම සංචාරක කණ්ඩායම වූ රුසියානු ජාතිකයන් 328 දෙනෙකු රැගත් , රුසියානු ගුවන් සේවයට අයත් අසූර් එයා (asur air ) ගුවන් සේවයේ ඉසෙඩ්.එස්.- 7749 දරන ගුවන් යානය රුසියාවේ මොස්කව් නුවර සිට පසුගිය 26වනදා දහවල් 11.05 ට කටුනායක බණ්ඩාරනායක ජාත්‍යන්තර ගුවන් තොටුපළ වෙත පැමිණි ඇත.

පැමිණි සංචාරකයන් පිරිස ශ්‍රී ලංකාවේ දින 10 ක් ගත කරන අතර , ඔවුන් බෙන්තොට , ඇල්ල , සීගිරිය , නුවර , නුවරඑළිය , අනුරාධපුරය ආදී ශ්‍රී ලංකාවේ ඓතිහාසික සහ සංචාරක ආකර්ෂණය සහිත ස්ථාන නැරඹීමට නියමිතය.

මෙම සංචාරකයන් රැගත් ගුවන් යානා රුසියාවේ මොස්කව් , ඊකැතරින්බර්ග් සහ සාන්ත පිට්ස්බර්ග් යන නගර වල සිට කටුනායක ගුවන් තොටුපළ වෙත පැමිණීමට නියමිතය.

ඒ අනුව අද (30) අලුයම 2.10 ට එවැනි ගුවන් යානයක් ඊකැතරින්බර්ග් නුවර සිට සංචාරකයන් 325 ක් රැගෙන පැමිණි අතර , එවැනිම තවත් ගුවන් යානයක් හෙට (31) අලුයම සාන්ත පිට්ස්බර්ග් නුවර සිට ද පැමිනෙනු ඇති.

මෙම රුසියානු සංචාරක කටයුතු ශ්‍රී ලංකාව තුළ සම්බන්ධීකරණ සහ මෙහෙයුම් කටයුතු සිදු කරන්නේ එක්සෝටික් හොලිඩේස් ඉන්ටර්නැෂනල් ආයතනයයි.