අඛණ්ඩ දුම්රිය වැඩ වර්ජනය නිසා දුම්රිය මාර්ගවලට ආසන්න මාර්ගවල ධාවනය වන බස්රථවල දෛනික ආදායම සියයට පනහකින් පමණ වැඩිවී ඇතැයි ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා පවසයි.

දුම්රිය වර්ජනයක් අඛණ්ඩව කි‍්‍රයාත්මක වුවද දුම්රියෙන් ගමන් කරන්නේ සමස්ත මගීන්ගෙන් සියයට පහක් වැනි සුළු පිරිසක් බවත් ඒ මහතා සඳහන් කළේය.

දුම්රිය වර්ජනය නිසා පෞද්ගලික බස්රථ 19,000 ක් පමණ සහ ලංගම බස්රථ 5000 ක් පමණ සේවයට යොදවා තිබීම නිසා දුම්රිය වර්ජනයක් පැවැතියත් ජනතාව රාජකාරි ඇතුළු එදිනෙදා අවශ්‍යතා සඳහා වාර්තා කිරීමට හැකිවී තිබෙන බව රාජ්‍ය සහ පෞද්ගලික අංශ වෙතින් වාර්තා වී තිබෙන බවද ඔහු කීවේය.

පෞද්ගලික බස්රථ තම කාර්යයන් නිසි ලෙස ඉටුකළත් රජයෙන් පෞද්ගලික බස් කර්මාන්තයට කිසිදු සහනයක් නොලැබෙන බවද හෙතෙම සඳහන් කළේය. අවම වශයෙන් පෞද්ගලික බස්රථ වලින් මාසයකට කප්පම් වශයෙන් විවිධ පාර්ශ්ව ලබාගන්නා රුපියල් කෝටි 20 ක පමණ මුදල නවතා දැමීමට පියවරක් ගෙන නැතැයි ද ගැමුණු විජේරත්න මහතා වැඩිදුරටත් ප‍්‍රකාශ කළේය.