ශ්‍රී ලංකා නිදහස් පක්ෂය පොදුජන පෙරමුණ සමග සිදු කරන සාකච්ඡා අසාර්ථක වුවහොත් ශ්‍රී ලංකා නිදහස් පක්ෂයෙන් ඉදිරි ජනාධිපතිවරණයට අපේක්ෂකයෙකු ඉදිරිපත් කරන බව එම පක්ෂයේ මාධ්‍ය ප්‍රකාශක පාර්ලිමේන්තු මන්ත්‍රී වීරකුමාර දිසානායක මහතා පවසයි.

අනුරාධපුරයේ පැවති මාධ්‍ය හමුවකට එක් වෙමින් ඒ මහතා මේ බව සඳහන් කළේය.

ජනධිපති මෛත්‍රීපාල සිරිසේන මහතාට නැවත ජනාධිපතිවරණයට ඉදිරිපත් වන ලෙස ශ්‍රි ලංකා නිදහස් පක්ෂ මන්ත්‍රී කණ්ඩායම යෝජනා කර ඇති නමුත් ජනාධිපතිවරයා ඒ සම්බන්ධව කිසිදු මතයක් මෙතෙක් ඉදිරිපත් කර නොමැති බවත් වීරකුමාර මහතා පවසයි.

එසේම එක්සත් ජාතික පක්ෂය සුළු පක්ෂවල ඉල්ලීම් සළකා බලා අලියා ලාංඡනය ඉවත් කොට පොදු ළකුණකින් ජනාධිපතිවරණ අපේක්ෂකයා ඉදිරිපත් කිරීමට කටයුතු කිරීම හොඳ ප්‍රවණතාවයක් බවත් එය ආදර්ශයට ගෙන අනෙක් පක්ෂත් ක්‍රියා කළ යුතු බව ඒ මහතා පවසයි.

එසේ නොමැතිව දේශපාලක ගමනක් යාමට හැකියාවක් නැති බවයි ඒ මහතා වැඩිදුරටත් ප්‍රකාශ කර සිටියේය.