අප්‍රේල් 21 වැනි පාස්කු ඉරු දින ත්‍රස්තවාදී ප්‍රහාරයක් එල්ල වූ මීගමුව කටුවපිටිය පල්ලියට ආසන්නව තිබෙන පිළිමයකට (සුරුවම) ඊයේ (05) නාදුනන පිරිසක් විසින් ප්‍රහාරයක් එල්ල කිරීම හේතුවෙන් එම ප්‍රදේශයේ උණුසුම්කාරී තත්ත්වයක් ඇති වී තිබෙන බව වාර්තා වේ.

අප්‍රේල් 21 වැනි දින එල්ල වූ ත්‍රස්ත ප්‍රහාරයන්හි ප්‍රධාන ඉලක්කයක් වූ කටුවපිටිය පල්ලියට එල්ල කළ ප්‍රහාරයෙන් එහි සිටි බැතිමතුන් 100කට අධික පිරිසක් ජිවිතක්ෂයට පත් විය.

කොළඹ අගරදගුරු මැල්කම් රංජිත් කාදිනල් හිමිපාණන් ඇතුළු කතෝලික පියතුමන්ලා එම ප්‍රදේශයට ගොස් සිද්ධිය වූ ස්ථානයේ සිටින අසල්වාසීන් සමඟ සාකච්ජාවක නියැලී තිබිණි.

එහිදී එම අසල්වාසීන් පවසා තිබෙන්නේ සිය ප්‍රදේශය අනාරක්ෂිත බැවින් ක්ෂණිකවම විසදුම් ලබා දිය යුතු බවයි.