අද (04) පැවැත්වෙන 5 ශ්‍රේණිය ශිෂ්‍යත්ව විභාගය සඳහා දිවයින පුරා මධ්‍යස්ථාන 2995කදී අයදුම්කරුවන් තුන්ලක්ෂ 39,369 දෙනෙකු පෙනී සිටීමට නියමිතව ඇත.

පෙරවරු 09.30ට විභාගය ආරම්භ වන බැවින් සෑම විභාග අපේක්ෂකයෙකුම පෙරවරු 09.00 වනවිට විභාග මධ්‍යස්ථාන වෙත පැමිණිය යුතු බවයි විභාග දෙපාර්තමේන්තුව සඳහන් කළේය.

ශිෂ්‍යත්ව විභාගය අවසන් වු පසුත් ශිෂ්‍යත්ව ප්‍රශ්න පත්‍රය රහස්‍ය ලේඛනයක් වන බව එම දෙපාර්තමේන්තුව පවසයි.

ප්‍රශ්න පත්‍ර ළඟ තබා ගැනීම, පිටපත් කිරීම, ඡායා පිටපත් ලබා ගැනීම, විකිණීම, මුද්‍රණය කිරීම, පුවත්පත්වල, වාර සගරාවල, වෙනත් මුද්‍රිත මාධ්‍යවල මුද්‍රණය කර ප්‍රසිද්ධ කිරීම, අන්තර්ජාලයේ, සමාජ ජාල වෙබ් අඩවිවල හා වෙනත් කුමන ආකාරයකට හෝ ප්‍රසිද්ධ කිරීම තහනම් වන බව සඳහන්.

කිසියම් පුද්ගලයෙකු හෝ ආයතනයක් එම නියෝග උල්ලංඝණය කරන්නේ නම් ඒ සම්බන්ධයෙන් ලඟම ඇති පොලිස් ස්ථානය, පොලිස් මූලස්ථානය හෝ විභාග දෙපාර්තමේන්තුව වෙත පැමිණිලි කළ හැකි බවයි විභාග දෙපාර්තමේන්තුව සඳහන් කළේය.